Asfedro celebra 40 anos contra as adiccións cunha xornada que une "pasado, presente e futuro"

A entidade ASFEDRO (Asociación Ferrolá de Drogodependencias), referente na atención ás adiccións en Ferrolterra, Eume e Ortegal, que comezou a súa actividade hai 40 anos no barrio ferrolán de Caranza, desenvolverá ao longo deste ano 2025 diversas actividades para conmemorar esta efeméride, onde ha ido evolucionado cos tempos á hora de afrontar as adiccións, primeiro só ás drogas e agora mesmo a un novo fenómeno, como son as redes sociais.

É por iso que se presentou na mañá deste mércores no Concello de Ferrol algúns dos actos programados, nunha rolda de prensa na que estivo presente a concelleira de Benestar Social, Rosa Martínez Beceiro (PP); a presidenta de ASFEDRO, Sari Alabau, ademais da traballadora social, Helena Insua, na que destacaron a evolución da institución desde a súa creación en 1985 para combater a "epidemia da heroína" ata abordar as novas adiccións comportamentales, como as redes sociais.

Rosa Martínez destacou o legado da entidade, xa que "naceu nun momento crítico para responder a unha emerxencia social" e que hoxe, catro décadas despois, o seu labor en prevención, tratamento e saúde mental segue sendo vital", ademais de facer mención ao recoñecemento nacional recibido por Sari Alabau, quen foi condecorada coa Cruz de prata da Orde de Mérito do Plan Nacional sobre Drogas.

OS PIONEIROS

Pola súa banda, Alabau lembrou aos que iniciaron este labor, xa que "sen a valentía de quen enfrontou incomprensión e estigma nos anos 80, hoxe non celebrariamos estes 40 anos".

Sobre o primeiro acto desta efeméride detallou que "as actividades comezarán o 24 de abril na sala multiusos do Porto de Ferrol", na Sala Curuxeiras, cunha xornada profesional e culminarán en outubro cunha gala no Teatro Jofre.

"A sociedade aínda necesita urxentemente o noso traballo, se ASFEDRO non existise, habería que inventala", e que "queremos que a cidadanía lembre que as adiccións non son só cousa do pasado, seguen esnaquizando vidas, e a nosa resposta debe evolucionar", sentenciou Alabau.

Mentres, Helena Insua, detallou que o programa do 24 de abril "revisará como se abordaban as adiccións nos 80, cando apenas había recursos, e contrastará cos desafíos actuais, como as adiccións sen sustancia".

Entre os relatores figuran exresponsables do Plan Nacional de Drogas, representantes de AXUNTADE (a maior rede de entidades do sector en Europa) e profesionais que lideraron a loita contra a heroína.

As inscricións, aínda abertas, poden realizarse mediante un código QR difundido pola organización.

ASFEDRO, fundada en plena crise da heroína en Ferrol, adaptou o seu labor aos novos tempos. "Antes predominaba o perfil desestructurado, hoxe atendemos a familias afectadas por adiccións ás compras ou redes sociais", detallou Insua.

O Presidente Da Deputación Da Coruña, Valentín González Formoso, E A súa Homóloga Da Asociación Ferrolá De Drogodependencias (Asfedro), Rosario Alabau, Asinan Un Convenio De Colaboración. DEPUTACIÓN DA CORUÑA