A Xunta require a outra persoa que acredite ser parte interesada no procedemento de Altri

O Diario Oficial de Galicia (DOG) publica este mércores un novo requirimento a unha persoa para que acredite ser parte interesada no procedemento da planta de Altri en Palas de Rei. O número de persoas ás que se lle pediu isto supera xa o milleiro. En anteriores ocasións, o DOG publicou este requirimento de forma colectiva, para centos de individuos.

Os afectados por esta notificación son citados con nome e apelidos para que no prazo máximo de 10 días hábiles --contados desde o día seguinte ao da publicación do anuncio no taboleiro edictal único do BOE-- acrediten os requisitos sinalados para o recoñecemento como parte interesada no procedemento. O anuncio da Consellería de Economía e Industria está asinado polo secretario xeral de Industria e Desenvolvemento Enerxético, Nicolás Vázquez Iglesias.

Segundo a normativa da Administración galega, considéranse interesados nun procedemento administrativo: aqueles que o promovan como titulares de dereitos ou intereses lexítimos individuais ou colectivos; aqueles que teñan dereitos ou intereses que poidan resultar afectados pola decisión que se adopte; asociacións e organizacións representativas de intereses económicos e sociais; así como cando a condición de interesado derivase dalgunha relación xurídica transmisible, entre outros. Nos últimos meses chegaron cartas da Consellería de Economía aos domicilios de persoas que solicitaron ser parte interesada para que acrediten esta condición.

Dúas persoas durante unha nova manifestación contra Altri, a 22 de marzo de 2025, na Pobra do Caramiñal | Fonte: Elena Fernández - Arquivo