O presidente da FEGAMP cre que os orzamentos da Xunta non atenden as demandas dos concellos

O presidente da Federación Galega de Municipios e Provincias (Fegamp), Alberto Varela, considera que "aínda hai tempo para unha revisión en positivo da dotación orzamentaria para 2025 do fondo de cooperación local".

Varela sinala que levaba "desde antes do verán tentando manter unha reunión co conselleiro de Presidencia, para recuperar a negociación previa que se produciu en anos pasados, da dotación e criterios de repartición do fondo de cooperación local".

Tras o encontro "sobre a marcha" para "coñecer a proposta da Xunta", os orzamentos aprobados polo Consello da Xunta que se presentan estes días no Parlamento son un documento "sen atender as demandas" dos municipios, segundo censura.

Ao seu xuízo, "quince anos deberían ser suficientes para desconxelar e revisar á alza os pouco máis de 112 millóns da parte incondicionada" deste fondo.

A proposta da Xunta de incorporar 5,4 millóns "só para os concellos de menos de 15.000 habitantes", na súa opinión, "segue a liña de condicionar a financiacion local defendida pola Xunta nestes anos".

O grupo de municipios de 20.000 a 50.000 habitantes, avisa, é "o que conta de media con menores ingresos por habitante de toda Galicia". E apunta que "é certo que os concellos con menor número de poboación teñen tamén unhas dificultades que se deben ter en conta (...) pero iso non debe derivar na exclusión duns concellos que tamén teñen esa problemática".

O presidente da Fegamp, Alberto Varela, nunha rolda de prensa | Fonte: Fegamp.