Tiña máis de 80 armas que adquiriu por Internet, fiscalía pide case 7 anos de prisión
Entre as armas incautadas pola Garda Civil en 2019 había 34 revólveres, 32 pistolas, fusís, escopetas e máis de 3.400 cartuchos de munición.
Por Europa Press / Redacción | Santiago de Compostela | 10/11/2024 | Actualizada ás 14:01
A Audiencia Provincial de Pontevedra xulgará o vindeiro martes e o vindeiro xoves a un home que se enfronta a seis anos e seis meses de prisión por tenencia ilícita de máis de 80 armas que adquiriu a través de Internet. Segundo o escrito da Fiscalía, os feitos remóntanse a 2019, cando a Garda Civil localizou durante unha inspección un total de 84 armas e munición en dous domicilios de Ponteareas.
Das 84 armas de fogo, había 34 revólveres, 32 pistolas, dez eran armas de guerra, tres escopetas de caza, dous fusís, un mosquetón, un rifle e máis de 3.400 cartuchos, ademais doutras pezas auxiliares como 47 cargadores.
Ademais, 44 das armas de fogo incautadas "estaban en aparente estado normal de funcionamento" e eran posuídas ilegalmente, sen ningún título que autorizase a tenencia ou posesión de ditas armas.
Por todo iso, pídese unha pena de seis anos e seis meses de prisión e inhabilitación especial para o exercicio do dereito de sufraxio pasivo durante o tempo da condena, así como o pago das costas.
