A Fegamp propón crear un órgano permanente coa Xunta que vele polas competencias e a autonomía locais

A Federación Galega de Municipios e Provincias (Fegamp) propón crear, a través da lei de medidas que acompaña aos Orzamentos autonómicos para 2025, un órgano "permanente" e "de carácter paritario", no que tamén estea representada a Xunta, para "garantir o respecto á autonomía e competencias locais".

É unha das propostas que aprobou a comisión executiva extraordinaria do ente municipalista e que xa remitiu aos grupos parlamentarios (PP, BNG, PSdeG e Democracia Ourensana), para que os inclúan entre as súas emendas ás contas para o próximo ano, que están en plena tramitación parlamentaria. O luns celebrarase un pleno no que se debaterán as emendas á totalidade presentadas pola oposición, que previsiblemente serán tombadas polos populares.

O novo órgano que propón a Fegamp serviría para "garantir" a autonomía das administracións locais no que respecta a procesos de elaboración normativa, así como na xestión e planificación das políticas públicas, especialmente aquelas que chama "de competencia compartida", como os servizos sociais, as augas, os portos, o tratamento de residuos e as policías locais.

Ademais, a federación que preside Alberto Varela, insta á Xunta a "potenciar as funcións" da Comisión Galega de Cooperación Local e a convocala de forma "periódica e regular", e "en todo caso" antes de aprobar os Orzamentos autonómicos e as normas que regulen o réxime local. Nesta mesma liña, tamén propón modificacións legais para que sexa "preceptiva" a audiencia a asociacións de municipios e provincias na tramitación de disposicións de carácter xeral e anteproxectos de lei, así como para estender a 15 días o prazo mínimo para que estes organismos emitan os seus informes.

AUMENTOS EN PARTIDAS

Así mesmo, nas emendas aos propios orzamentos suxeridas pola Fegamp inclúese un aumento do Fondo de Cooperación Local (FCL) e que a repartición de recursos con cargo ao mesmo sexa todo "incondicionado" e que se distribúa atendendo a "poboación, superficie, núcleos de poboación e porcentaxe de maiores de 65 anos".

No ámbito das políticas sociais, a federación que dirixe Varela reclama que as administracións autonómica e estatal asuman "anualmente" o "custo íntegro" do Servizo de Axuda non Fogar (SAF); un fondo específico anual que cubra "a totalidade dos custos" das escolas infantís municipais, non só a gratuidade das matrículas; e outra partida dirixida ao equilibrio demográfico territorial.

En sanidade, a Fegamp pide un incremento da partida destinada aos programas de drogodependencia, para cubrir todos os gastos das 13 unidades de asistencia mentres estas non se integren no Sergas. Finalmente, as emendas propoñen que a Xunta achegue "a cantidade total prevista" a recadar polo imposto de vertedoiros e incineración, para así aplicar as bonificacións no canon que Sogama cobra aos concellos, que o próximo ano ascenderá a 108 euros por tonelada.

Os presidentes da Federación Galega de Municipios e Provincias (Fegamp), Alberto Varela, e da Xunta, Alfonso Rueda | Fonte: XUNTA