Traballadores e Navantia chegan a un principio de acordo na negociación do novo convenio
"Non de todos, pero si de puntos importantes, como o tema das promocións, a clasificación profesional ou as xornadas en Reparacións", detallou o secretario do comité de empresa de Navantia Ferrol, Marcelo Amado (CIG), que advertiu tamén de que "quedan moitos temas aínda por tratar", entre os que citou a redución horaria, "recuperar" o poder adquisitivo e a industria auxiliar, entre outros.
Por Europa Press / Redacción | FERROL | 29/11/2024 | Actualizada ás 17:01
O secretario do comité de empresa de Navantia Ferrol, Marcelo Amado (CIG), avanzou que chegaron a un "principio de acordo de varios puntos" do novo convenio. "Non de todos, pero si de puntos importantes, como o tema das promocións, a clasificación profesional ou as xornadas en Reparacións", detallou tras a asemblea que tivo lugar este venres no estaleiro.
Amado explicou que tiveron un "achegamento moi importante" en GP1 e GP2, que son os técnicos superiores, e tamén en GP3 e GP4, de operarios, xa que "practicamente" a empresa asumiu a proposta dos traballadores. O representante do sindicato detallou que "quedan moitos temas aínda por tratar", entre os que citou a redución horaria, "recuperar" o poder adquisitivo e a industria auxiliar, entre outros. Por iso, volverán reunirse coa dirección de Navantia o vindeiro martes e mércores. Neste sentido, Amado indicou que, nos tres encontros celebrados esta semana, viron unha actitude "bastante máis receptiva" por parte da empresa.
