Denuncian que o programa de retorno de emigrantes da Xunta non facilita nin emprego nin traballo

O Foro Galego de Inmigración denunciou que a nova edición do programa 'Retorna Cualifica Emprego', iniciativa da Xunta para facilitar o acceso a ofertas de traballo a emigrantes de orixe galega, "mantén" as características da convocatoria anterior e "non garante" o acceso a un posto de traballo ou a unha vivenda.

Deste xeito, lamentou que "se manteñen" as características e condicións que fixeron que "decenas" de persoas retornadas "quedasen sen acceder ao emprego prometido e a unha vivenda digna" na edición anterior. Neste sentido, explicou nunha nota de prensa que a nova convocatoria "non garante" o acceso a un posto de traballo, xa que "mantén a referencia a un compromiso de traballo, non a un contrato laboral".

"Isto supuxo nos casos denunciados ante o Foro que, ao chegar aquí, non se materializasen eses compromisos en contratos de traballos reais, e o servizo real foi simplemente de formación e orientación laboral", lamentou. Así mesmo, denunciou que esta nova convocatoria "non garante tampouco" o acceso a unha vivenda, xa que asegurou que establece axudas económicas "básicas e reducidas a un breve período de tempo" que "non garanten" o acceso a unha vivenda.

"Na actual situación e coas dificultades que o conxunto da cidadanía ten para acceder a unha vivenda digna de aluguer, as simples axudas, como sucedeu na anterior edición, provocarán que moitas destas persoas non consigan atopar vivendas en réxime de aluguer", advertiu.

Nesta liña, o Foro Galego de Inmigración fixo fincapé en que este acceso á vivenda debería estar "garantido" no Programa por parte da administración ou das entidades que o desenvolven. Con todo, afeou á Xunta que poña en marcha actuacións que "comprometan" a situación de persoas de orixe galega "que deixan o seu lugar de vida, traballo, familia, en base a unhas promesas que despois na realidade non se poden cumprir".

O secretario xeral da Emigración, Antonio Rodríguez Miranda, na súa visita á Oficina Integral de Asesoramento e Seguimento ao Retorno de Santiago. XUNTA