A CIG pide máis control sobre o "abuso dos ERTE" e de contratos fraudulentos na automoción

CIG-Industria instou este mércores ás administracións públicas a controlar o "abuso de ERTE" e dos contratos fraudulentos a través de empresas de traballo temporal no sector da automoción.

Así o fixeron os seus responsables nas concentracións de protesta que tiveron lugar en Vigo, Pontevedra e Ourense, nas que pediron á Inspección de Traballo e á Xunta que actúen e acepten reunirse co sindicato para "abordar esta problemática".

O secretario nacional da Federación de Industria, Xoán Xosé Bouzas, denunciou que as prácticas que levan a cabo no sector actualmente profundan na "precarización" e impiden a conciliación de vida laboral e familiar.

"Nos próximos días rexistraremos as peticións para manter esas reunións a nivel galego co propio conselleiro e con responsables da autoridade laboral para reclamarlles que fagan un seguimento exhaustivo de todos os ERTE abusuvos e que non están xustificados", explicou Bouzas.

Así mesmo, a CIG pon o foco nos "contratos fraudulentos mediante ETT", que se están "estendendo" na automoción galega, de maneira que se cobren "ducias" de postos fixos con persoal eventual.

Finalmente, o sindicato nacionalista apuntou á Xunta pola súa "falta de poítica industrial de país", e puxo como exemplo o último encontro de Rueda con responsables da planta de Stellantis "para mendigar que lle digan cales son os plans da empresa, cando debería ser ao revés", e debería ser el quen explicase os plans do goberno galego "para garantir o futuro da automoción".

Concentración de protesta da CIG en defensa do sector da automoción, a 18 de decembro de 2024.. CIG VIGO | Fonte: Europa Press