Remata o bo tempo que acompañou a Galicia este Nadal: achéganse uns Reis pasados por auga e vento

A Axencia Estatal de Meteoroloxía (AEMET) sinalou que o domingo 5 de xaneiro e o luns 6, aínda que con incerteza, é probable que as precipitacións se estendan por boa parte das vertentes cantábrica e atlántica, máis fortes e persistentes no oeste de Galicia e do sistema Central, e menos probables canto máis ao leste. Tamén avisa da probabilidade de que eses días aumente o vento do oeste e suroeste na Península e área mediterránea, con intervalos fortes e probables refachos moi fortes en Galicia e Cantábrico, sen descartar que poidan estenderse localmente a outras zonas do cuadrante noroccidental.

As temperaturas mínimas poderían continuar en ascenso, con xeadas restrinxidas a zonas de montaña, mentres que as máximas poderían descender o domingo 5. Pola súa banda, en Canarias é probable que continúe a estabilidade, os ceos pouco nubrados, o vento do leste e temperaturas con poucos cambios. Uns días antes, entre o luns 1 e o sábado 4 de xaneiro, continuará a inestabilidade na área mediterránea os primeiros días, con chuvascos ocasionais, acompañados de treboada, no litorais leste e sueste peninsulares, costa do Sol, Melilla e sur de Baleares. Poderían ser localmente fortes, especialmente no golfo de Valencia e Pitiusas, o luns 1.

As precipitacións iranse estendendo por Galicia, onde poderían ser localmente fortes e persistentes, Cantábrico e Pireneos occidentais a partir do día 2. As néboas, aínda densas e localmente enxeantes o día 1 nas depresións interiores, irán disipándose despois. As temperaturas, con poucos cambios ao principio, irán ascendendo, polo que as xeadas irán perdendo extensión e intensidade. Aumentará o vento do suroeste en Galicia e Cantábrico occidental, con probables refachos moi fortes ao final, mentres no resto irá rolando de leste, frouxo, a oeste e suroeste. En Canarias continuará a situación estable, sen descartar precipitacións débiles e dispersas, con vento do leste e temperaturas sen cambios.

Os Reis Meigos saen do Renfe Alvia á cabalgata de Reyes, a 5 de xaneiro de 2022, en Ourense | Fonte: Rosa Veiga - Arquivo