Rueda defende o pacto PP-Vox-Junts: "A ver se a xente é parva e a culpa é da oposición"

O presidente da Xunta, Alfonso Rueda, censurou que o Goberno central "tentase coar moitas medidas" a través do decreto ómnibus e pediu que deixe "de perder o tempo" e leve a votación "por separado" asuntos como a alza das pensións. Preguntado polo voto en contra do PP e o seu pacto con Junts e Vox, Rueda, que asegurou compartir esta decisión tomada polo PP nacional, sostivo que ese incluía algunhas medidas que "non teñen discusión" pero tamén contemplaba outras que, na súa opinión, "son moi discutibles", "facendo unha especie de ou o tomas todo, ou non tes nada".

"Non sei se é peor iso ou pensar que a xente é parva e que vai pensar que a culpa de que non se aproban estas medidas tena a oposición e non o Goberno, que decidiu expolo así", sinalou. Así, destacou que o que pide o PP é que estas medidas se fagan por "separado" e destacou que "se o Goberno quere aprobar o decreto no que se deciden as pensións, teno facilísimo". "Outra cousa é que o Goberno quere outras cousas e no que menos pensa é nos xubilados", dixo para asegurar que o Executivo autonómico está aos "cálculos políticos e ás tácticas de supervivencia de Pedro Sánchez".

Neste punto, preguntado polas declaracións nas que o dirixente popular Miguel Tellado criticou a cesión do palatece que foi sede do Goberno vasco en París ao PNV, Rueda incidiu no seu rexeitamento a que o Executivo estatal tratase de "coar" medidas tendo en conta que "se está xogando os apoios parlamentarios". "Dicir que se non se aproba o do palacete, non se aproban as pensións retrata perfectamente ao PSOE e ao presidente do Goberno", afirmou.

O PSOE DE OURENSE PIDE AO PP QUE DEA EXPLICACIÓNS AOS PENSIONISTAS

Ao respecto, o Partido Socialista de Ourense solicitou ao Partido Popular que dea explicacións públicas "aos máis de 108.000 pensionistas" da provincia que "deixarán de cobrar 441 de media anuais" ao non prosperar o decreto 'ómnibus' no Congreso. A deputada no Congreso, Marga Martín Rodríguez, e o senador, Rafael Rodríguez Villarino, ofreceron este luns unha rolda de prensa na que cargaron contra a postura do Partido Popular.

Segundo Martín Rodríguez, a postura do PP prexudica a "os máis de 108.000 pensionistas da provincia que deixarán de cobrar 441 euros de media anuais", o que supón que "non veñan para Ourense uns 48 millóns de euros". Ademais sinalou que 14.000 ourensáns "deixarán de cobrar máis de 500 euros de media adicionais" e máis de 10.000 persoas "veranse prexudicadas en termos de ingreso mínimo vital". No caso do bono social térmico, afectará a 14.574 vivendas na provincia. Tamén mencionou o impacto sobre o transporte público, que xa non terá bonificacións, obrigando aos usuarios a pagar 440 euros mensuais por viaxar entre Ourense e A Coruña.