Escotet presume dos resultados récord de beneficios de Abanca: 1.203 millóns en 2024

Abanca alcanzou a súa marca de beneficios en 2024, cun total de 1.203,1 millóns de euros, o que supón 491,8 millóns máis que os 711,3 millóns de 2023 (+69,1%).

En rolda de prensa en Santiago, o presidente de Abanca, Juan Carlos Escotet, destacou que estes son os "mellores resultados" desde o inicio da entidade financeira, nun ano moi "especial" ao cumprirse unha década da posta en marcha do banco.

Así, Escotet subliña a "transformación de éxito" entre 2014 e 2024 ata ser "unha das entidades máis sólidas do sector", incluída unha "importante expansión" en España e Portugal. Tras a compra do portugués EuroBic, Abanca elevou o seu volume de negocio por encima dos 128.000 millóns. Ademais, captou 135.000 novos clientes, con especial énfase fóra da zona galega.

A entidade financeira alcanzou unha rendibilidade ROTE recorrente do 16,5% debido ao crecemento do negocio, que elevou a marxe básica nun 28,9%, e "da boa xestión do balance", resalta o banco.

Oficina de Abanca | Fonte: ABANCA