Prisión provisonal para o exdeputado Xabier Ron logo dunha denuncia por agresión sexual a unha menor
A denuncia en cuestión foi interposta pola nai dunha menor e por mor dela emitiuse un exhorto por parte do Xulgado de Instrución número 1 de Santiago de Compostela para entrar e rexistrar dúas vivendas vinculadas ao agora profesor e o seu material tecnolóxico, tanto móbil como ordenador
Por Europa Press / Redacción | SANTIAGO DE COMPOSTELA | 30/01/2025 | Actualizada ás 16:10
A xuíza determinou o ingreso en prisión provisional para o exdiputado autonómico do grupo Alternativa Galega de Esquerda (AGE) Xabier Ron, ao que axentes da Garda Civil detiveron este martes por mor dunha denuncia por agresión sexual a unha menor de idade.
O detido pasou na mañá deste xoves a disposición da titular do Xulgado de Instrución número 1 de Santiago de Compostela, Ana López-Suevos, que instrúe o caso. Chegou aos xulgados de Fontiñas sobre as 8,30 horas nun vehículo da Garda Civil desde o posto de Milladoiro e non saíu ata pasadas as 15,30 horas, rumbo a prisión.
A denuncia en cuestión foi interposta pola nai dunha menor e por mor dela emitiuse un exhorto por parte do Xulgado de Instrución número 1 de Santiago de Compostela para entrar e rexistrar dúas vivendas vinculadas ao agora profesor e o seu material tecnolóxico, tanto móbil como ordenador.
Ron foi detido este martes e, na mesma xornada, trasladado por varios axentes ao IES Breamo, en Pontedeume, instituto no que este curso exerce como docente de francés e onde se procedeu a rexistrar, na súa presenza, material informático da súa propiedade.
Tras abandonar a primeira liña política e antes de dar clases en Pontedeume --centro no que se efectuou un dos rexistros do seu material informático, pero no que non se produciron os feitos investigados--, Ron exerceu como profesor nas localidades coruñesas de Touro e Ames. Neste último instituto impartiu clases ata o curso pasado.
Doutor en Filoloxía Románica e integrante do Grupo de Investigación de Románicas da Universidade de Santiago de Compostela (USC), Ron entrou no Parlamento de Galicia en 2012 como integrante de AGE, grupo que entón lideraban a agora vicepresidenta segunda do Goberno e ministra de traballo, Yolanda Díaz, con quen, ademais, compartía o vínculo de EU, e o histórico nacionalista Xosé Manuel Beiras.
Desaparecida a coalición, Ron, quen tamén foi candidato por EU-EU á Alcaldía de Santiago, apartouse da primeira liña política e exercía desde entón a docencia.
