Pontevedra aproba o anteproxecto do orzamento de 2025, que ascende a algo máis de 98 millóns de euros

A xunta de goberno local do Concello de Pontevedra aprobou este mércores o anteproxecto de orzamento municipal para este ano 2025. Segundo informou en rolda de prensa o concelleiro de Economía e Facenda, Raimundo González, o orzamento ascende a 98.632.000 euros, o que supón un incremento próximo aos catro millóns de euros, en comparación ao exercicio orzamentario do pasado 2024 (+4,12 %).

Así, Raimundo González sinalou que o apartado que máis sobe é o de bens e servizos, tamén chamado gasto corrente. Aparecen aquí recollidos a organización en Pontevedra dos Premios Feroz ou o Multisport de Tríatlon, tamén unha subida no orzamento das Festas de 263.000 euros, ou o mantemento de determinados bens municipais como os centros sociais ou as rozas dos camiños, entre outros. Tamén indicou que outro dos aspectos de gasto corrente que sobe está relacionado co lixo, en primeiro lugar, o novo contrato para a xestión dos residuos e limpeza urbana, pero tamén o canon de Sogama ou o novo servizo de información bidireccional.

Así mesmo, detallou que aumenta a súa contía o apartado de subvencións e transferencias, con partidas destacadas como as destinadas ao Culturgal, ou ao servizo do Coche de Punto, ademais doutras como as axudas deportivas ou as transferencias á Xunta de Galicia para o mantemento das Escolas Infantís. Ademais, González destacou o apartado de investimentos do orzamento municipal no que figuran proxectos como a renaturalización do río Gafos ou a construción do novo parque da Parda e outros proxectos como obras de accesibilidade no rural e no ámbito urbano, a mellora da eficiencia enerxética en toda a zona este da cidade, a reforma da rúa Pasantería ou o novo parque da Rúa Serra, segundo enumerou.

Para o concelleiro este ano 2025 vai ser "terriblemente investidor" por parte do Concello de Pontevedra, con actuacións "de todo tipo", desde a loita contra o cambio climático, a promoción da cidade, pasando polo mantemento dos espazos públicos e ata a dotación de novos equipamentos. Finalmente, o edil de Facenda lembrou que o consistorio local leva 10 anos coas taxas e impostos conxelados e cunha débeda de 6.990.188,20 euros.