Despidos na sanidade privada: Quirónsalud bota a nove persoas porque a UCI de Pontevedra dá perdas

O comité de empresa de Quirónsalud en Pontevedra convocou concentracións semanais ás portas deste hospital privado a partir deste martes 11 como reacción de protesta tras o anuncio da Dirección de proceder ao peche da Unidade de Coidados Intensivos (UCI) e ao despedimento de membros doutros servizos.

A presidenta do comité de empresa de Quirónsalud en Pontevedra, Teresa Quinteiro Silva, compareceu este luns en rolda de prensa para anunciar estas mobilizacións e sinalar que as decisións que adopta este centro sanitario afectan non só aos 219 traballadores, se non a "toda a cidadanía".

Teresa Quinteiro explicou que o pasado 21 de xaneiro os responsables da empresa comunicáronlles que a Unidade de Coidados Intensivos será pechada polas perdas que causa este servizo desde 2023 e que ascenderon a uns 762.000 euros durante o ano pasado. Segundo a presidenta deste comité, o argumento é "que a UCI non dá e que o tipo de cirurxías que se realizan non precisan dunha unidade de coidados intensivos". A este déficit suman que no 2024 só se fixeron catro cirurxías de garda, cunhas perdas 100.000 euros anuais.

"BAIXA RENDABILIDADE"

Teresa Quinteiro indicou que a diminución de ingresos hospitalarios e a baixa actividade cirúrxica son os argumentos que esgrime a empresa para xustificar este peche que levará o despedimento de catro dos cinco traballadores da UCI e a recolocación do resto do persoal, como os DUEs (Diplomado Universitario de Enfermaría) e TCAEs (técnicos en Coidados Auxiliares de Enfermaría), noutros servizos do hospital.

A dirección de Quirónsalud tamén anunciou a creación dunha Unidade de Recuperación (URPA) nas instalacións do quirófano, que inicialmente se expuxo como un servizo de luns a venres de 8,00 a 22,00, e nunha segunda reunión, a dirección modificouno a un operativo as 24 horas de luns a venres. Esta medida é rexeitada polos representantes sindicais porque consideran que reduce a atención crítica que brinda unha UCI, pondo en risco tanto a calidade asistencial como a seguridade dos pacientes, especialmente no contexto de cirurxías complexas.

Tamén alerta o comité da escaseza de enfermeiras debido á marcha destas profesionais cara á sanidade pública, onde atopan mellores condicións económicas e laborais, segundo manifestaron. Por último, insistiu en que o persoal está moi preocupada porque cren que o hospital pasaría a ser un centro ambulatorio con cirurxía menor se non renovase recentemente o concerto co Sergas, por 11 millóns en tres anos.

RESPOSTA DO QUIRONSALUD

Desde o Hospital Quirónsalud Miguel Domínguez indicaron este luns que están a adaptar a asistencia sanitaria que presta en Pontevedra "ás necesidades reais que lles expoñen os seus pacientes actuais, así como toda a poboación da súa área sanitaria de referencia". No último ano, expoñen, o Grupo Quirónsalud realizou "investimentos significativos" para ampliar, modernizar e facer máis accesible a asistencia sanitaria que presta.

Entre elas cabe destacar, a apertura dun novo Centro Médico de Consultas, a incorporación da cirurxía robótica, os novos equipos de radiodiagnóstico (TAC, resonancia magnética e mamógrafo dixital) e a mellora continua no equipamento do hospital. Tamén destaca a empresa a implantación "dunha innovadora iniciativa, o Scribe, un modelo de atención sanitaria centrado en humanizar a relación do profesional coa persoa que acode á consulta, grazas ao uso da intelixencia artificial".

CONTRATO POVISA

Por outra banda, a Consellería de Sanidade ampliou ata o vindeiro luns, día 17 de febreiro, o prazo para que Ribeira Povisa presente unha oferta para o novo contrato de servizos sanitarios na área de Vigo. Segundo fontes do Servizo Galego de Saúde (Sergas) consultadas por Europa Press, a Xunta decidiu estender o prazo debido a que se están contestando alegacións e ofrecendo as aclaracións solicitadas pola empresa en relación aos pregos do devandito documento.

"Seguindo o previsto na lei de contratos, e tendo en conta que faltan por resolver aínda certas dúbidas de interpretación en relación aos pregos de contratación, a Xunta comunicou unha ampliación do prazo", explicaron as mesmas fontes, apuntando ao próximo 17 de febreiro como data.

Todo iso despois de que a finais de ano o Goberno galego autorizase lanzar o contrato con Povisa por case 195 millóns de euros e unha vixencia inicial de dous anos. Con todo, o contrato sufriu un cambio importante: pasa de ser un concerto a un contrato de servizos, polo que debía saír a licitación e que a empresa se presentase ao proceso.