O PSdeG propón dar máis peso aos concellos na elaboración das leis

O Partido Socialista de Galicia aposta por que os concellos galegos teñan un maior protagonismo na elaboración das leis autonómicas que afecten ás súas competencias e intereses. Así se recolle no relatorio marco para o XV Congreso Nacional, que se celebrará en marzo en Santiago de Compostela e servirá para marcar as liñas estratéxicas da formación para os próximos catro anos.

MÁIS CAPACIDADE LEXISLATIVA PARA OS CONCELLOS

No documento, os socialistas galegos defenden que as entidades locais son "as administracións máis pequenas, pero tamén as máis resolutivas" e, por iso, propoñen que se lles recoñeza a capacidade de exercer a iniciativa lexislativa popular en temas da súa competencia. A intención é que a súa representación nos procesos parlamentarios sexa máis vinculante e valorada.

Así mesmo, o PSdeG critica o incumprimento do Pacto Local asinado en 2006 entre a Xunta e a Federación Galega de Municipios e Provincias (Fegamp), e denuncia que os concellos seguen asumindo competencias impropias sen o financiamento correspondente, o que consideran unha das principais causas das desigualdades no acceso a servizos públicos.

FINANCIAMENTO E CONDONACIÓN DA DÉBEDA

No ámbito económico, o PSdeG defende unha maior autonomía financeira para Galicia, coa participación directa na xestión e recadación dos impostos que nutren as arcas autonómicas. Ademais, o partido aposta por negociar a condonación da débeda da comunidade co Estado, en liña coas opcións que abre o Goberno central para outras comunidades autónomas.

"Defendemos unha condonación da débeda autonómica en termos proporcionais e respectuosos con todas as comunidades", recolle o documento.

Outro dos eixos do relatorio céntrase en políticas sociais, coa atención á saúde mental e a loita contra as adiccións como prioridades. Os socialistas propoñen a creación dunha área de atención infanto-xuvenil en cada área sanitaria e medidas máis estritas para limitar o acceso dos menores de idade ao xogo e ás apostas online.

Tamén propoñen fortalecer o traballo en rede no ámbito educativo para concienciar sobre os riscos das adiccións, incluíndo as novas tecnoloxías. Neste sentido, fontes socialistas avanzaron que se podería incluír no relatorio unha referencia explícita á regulación das adiccións dixitais a través das emendas ao documento.

Por último, o PSdeG tamén inclúe no relatorio un apartado sobre a protección animal, no que rexeita que as administracións públicas poidan financiar ou promocionar espectáculos que impliquen sufrimento animal. Esta postura implicaría, na práctica, a eliminación das corridas de touros en Pontevedra, a única praza activa en Galicia.