O BNG leva aos xulgados á TVG por non rectificar unha información falsa sobre a súa presenza nun acto de Castelao
A TVG rectificou a través das redes sociais, pero non no telexornal.
Por Europa Press / Redacción | SANTIAGO DE COMPOSTELA | 24/02/2025 | Actualizada ás 16:47
A viceportavoz do BNG, Olalla Rodil, acudiu este luns á vista xudicial nos xulgados de Santiago pola denuncia que presentaron contra a CRTVG para esixir o dereito de rectificación tras a información que cualifican de "falsa" emitida pola canle pública sonre a ausencia do BNG no acto de conmemoración do aniversario de Castelao.
"Esta falsa afirmación non foi rectificada pola TVG, a pesar de que así o esixe a lei", afirmou. Rodil lamentou ter que recorrer á vía xudicial para defender "un dereito básico e fundamental" como é o acceso a medios de comunicación "públicos, veraces e obxectivos".
"A CRTVG afirmou que ningún representante do BNG estivo presente na homenaxe organizada pola Fundación Castelao no Panteón de Galegos Ilustres, cando as imaxes da propia televisión demostran o contrario", remarcou Rodil. Así mesmo, a deputada nacionalista advertiu de que a situación da CRTVG está "lonxe de mellorar". "O Partido Popular non só se nega a rectificar, senón que está a piques de aprobar unha lei que reforzará o seu control absoluto sobre os medios públicos", afirmou.
Sinalou que esta reforma permitiría ao PP designar "a dedo" a dirección xeral da corporación e "vulneraría os dereitos profesionais dos traballadores da CRTVG". "No BNG temos claro que este é un feito gravísimo que atenta contra a calidade democrática do país e non imos deixar de defender, alí onde sexa necesario, o dereito dos galegos a ter uns medios públicos ao servizo de Galicia e non do Partido Popular", concluíu.
