Periodista Digital acusa a blogueiros galegos de “ameazar” ao Papa
Ao fío das polémicas pegatinas que comezan a agromar nas rúas de Compostela.
Por Galicia Confidencial | Santiago | 26/08/2010 | Actualizada ás 19:14
O diario electrónico Periodista Digital, cunha liña editorial moi próxima á dereita máis centralista, acusa aos blogueiros composteláns de opachavales.com de “ameazar a visita do Papa”.
O motivo da polémica son as pegatinas coa imaxe de Ali Agca, o cidadán turco que atentou contra Xoán Pablo II en Roma, deseñadas polos blogueiros e cada vez máis frecuentes nas rúas e bares composteláns.
Ao entender de Periodista Digital “se refleja una posible amenaza ante su próxima visita a Santiago”. Cómpre ter en conta, en todo caso, o evidente ton retranqueiro da totalidade de opachavales.com.
A Xunta estimou en catro millóns o gasto da visita do líder relixioso, pero entende que o beneficio económico para promocionar a imaxe do país é maior. A metade deses cartos, 2 millóns, gastaraos a CRTVG en contratar os medios para que a sinal de televisión se poida seguir en directo por todo o mundo.
O goberno prepara un macrocongreso de grandes empresarios arpoveitando a presenza do Papá. Un dos asistentes será Josep Piqué, amigo de Alberto Nuñez Feijoo, e presidente de Vueling.
