Que din os rumorosos 110 anos despois...
Pascual Veiga púxolle música a un fermoso poema de Eduardo Pondal que falaba da “nazón de Breogán”.
Por Galicia Confidencial | A Coruña | 17/12/2017 | Actualizada ás 18:00
O 20 de decembro de 1907 o Gran Teatro da Habana (Cuba) convertíase no escenario da primeira interpretación pública do Himno galego. Cento dez anos despois da estrea deste símbolo de Galicia, o Salón de Actos da Real Academia Galega acollerá o vindeiro mércores, ás 19:30 horas, un acto literario e musical para conmemorar o seu aniversario.
Organizado pola RAG en colaboración co Instituto José Cornide, contará coas achegas sobre distintos aspectos do Himno do musicólogo e académico correspondente Fernando López Acuña e do historiador e académico de número Ramón Villares. A parte musical correrá a cargo de Queiman e Pousa e concluirá coa interpretación colectiva do Himno. A entrada é libre ata completar capacidade.
A orixe do Himno, coa letra do poema "Os pinos" de Eduardo Pondal e música de Pascual Veiga, atópase no certame musical organizado polo propio Veiga e o Orfeón Coruñés nº 4 en 1890. A intervención de Fernando López-Acuña abordará aspectos relacionados coa parte musical desta composición, mentres que Ramón Villares se centrará no contexto e o significado histórico do Himno e da estrea na Habana.
Con este acto a Acadenia ponlle o ramo á celebración do centenario do pasamento de Eduardo Pondal (Ponteceso, 1835 – A Coruña, 1917). Co gallo desta efeméride, publicou a antoloxía da súa poesía Eduardo Pondal. Os cantos eran da Patria (120 poemas), unha edición a cargo do profesor da Universidade da Coruña Manuel Ferreiro concibida para achegar a calquera persoa interesada á obra do bardo bergantiñán. O investigador impartiu o pasado mércores unha conferencia sobre o escritor na Biblioteca Municipal de Estudos Locais da Coruña noutro acto organizado polo Instituto José Cornide e a Real Academia Galega.
