PP de Lugo replica que "o único conchabeo" é o de Campos "pactando acordos ocultos"

O Grupo Provincial do PP de Lugo respondeu este xoves ao presidente da Deputación, Darío Campos, que "o único conchabeo" que existe é o del "pactando acordos ocultos" que "lle están saíndo moi caros aos lucenses". Así o traslada, nun comunicado, despois de que Campos afirmase que non ten dúbidas de que o Partido Popular (grupo maioritario con doce deputados) e Manuel Martínez teñen un "conchabeo", que se traduce en converter os plenos "nun circo".

En fronte, os populares lembraron que hai pouco o deputado non adscrito revelou "que lle ofreceron 90.000 euros pola Presidencia de Suplusa, un pacto na sombra que agora os socialistas negan". "A este conchabeo de intereses entre os socialistas súmanse moitos outros pactos ocultos que acabaron por situalos nun goberno débil, en minoría e incapaz de traballar por esta provincia", esgrimiron.

O PP censura que o goberno provincial viva "enfrascado nas loitas de poder do PSOE, na repartición de postos e na confrontación máis desleal, cando desde o PP o que se ofrece sempre é diálogo, consenso e colaboración".