Os herdeiros de Franco deberán solicitar un novo nicho para os restos de familiares
Jorge Suárez, sobre En Marea: "O máis importante, máis que centrar a vida política de En Marea ao redor dunha persoa, é centrala nun proxecto no que todas as partes se sentan representadas".
Por E.P. | Ferrol | 23/09/2018 | Actualizada ás 16:32
O alcalde de Ferrol (A Coruña), Jorge Suárez, negou que os restos de familiares de Franco, que se atopan nun panteón na cidade que será expropiado, se depositen nunha fosa común, e instou aos seus herdeiros a que ou ben regularicen a situación do nicho ou soliciten outro "con normalidade". En entrevista na Radio Galega , Jorge Suárez resolveu así as posibles dúbidas sobre o futuro dos restos mortais dos avós, unha irmá e unha tía de Franco, depositados nun panteón que o pleno municipal aprobou que fose expropiado ao constatarse que fora entregado polo Concello como un "agasallo" ao ditador en 1967.
Aínda que a expropiación se adoptou en xullo en pleno debate sobre o futuro dos restos de Franco, Jorge Suárez incide en que os seus familiares se merecen un "trato digno", afastado da "crueldade" e de prácticas de "levar mortos a cunetas". "Non son responsables do que fixo o seu familiar, tres do catro non estaban vivos no Golpe de estado", "merécense un trato digno", "e o que hai que facer é instar a que regularicen a situación dese nicho ou ben dun no que poidan depositar os restos con normalidade", alegou.
En todo caso, admitiu que haberá que esperar para a expropiación efectiva. E é que o proceso non se abordará no próximo pleno municipal, tal e como estaba anunciado, posto que require trámites de notificación e audiencia que o atrasan. Jorge Suárez dá por descartado ademais que os familiares de Franco decidan enterrar os restos do ditador en Ferrol --a súa cidade natal-- asegurando que "polas informacións" das que dispón, todo apunta que o destino elixido será o Pardo.
DEBATES INTERNOS EN 'EN MAREA': "PARECE A VIDA DE BRIAN"
Ante as discrepancias internas de En Marea e o próximo proceso de renovación do Consello das Mareas, o máximo órgano de decisión entre plenarios, Jorge Suárez, representante de Ferrol en Común, replica que "falar todo o día do orgánico non conduce a bo porto" e que "debe quedar en ámbito interno" "Hai un gran traballo parlamentario que non transcende e o que transcende é se un di algo do outro, sectores e subsectores e parece 'A Vida de Brian' e é o camiño equivocado", suxeriu.
En todo caso, confía en que o proceso de renovación sexa "tranquilo", a condición de que non se realicen "alianzas estrañas de cúpulas por arriba". Suárez espera que as partes "diversas" que impulsaron En Marea manteñan a súa meta de crear unha Galicia "diferente" da de Feijóo, por ser "un obxectivo que debería acalar ruído, o afán desmedido de poder ou receos por que uns figuren máis que outros en páxinas de xornais", agregou.
Cuestionado por unha posible candidatura do denominado 'sector crítico' co Consello -Suárez apoiara a Compostela Aberta cando impulsou a Mesa da confluencia-- limitouse a asegurar que "non" ten "nin idea". E ante unha hipotética vitoria do actual portavoz, Luís Villares, sinalou que a "nivel político e persoal" ten todo o seu respecto, aínda que suxerindo que "o máis importante, máis que centrar a vida política de En Marea ao redor dunha persoa, é centrala nun proxecto no que todas as partes se sentan representadas".
ABERTO A PACTOS CON BNG, PSOE E CALQUERA FORZA DE ESQUERDAS
Jorge Suárez volverá ser candidato con FEC ás municipais a pesar de que define a actual lexislatura como "algo similar á guerra de Vietnam". Faino pola ruptura da coalición co PSOE, a presenza dun BNG ao que reprocha que apoiou a lexislatura pero tivo un excesivo nivel de esixencia e cun PP "descabezado". En canto a posibles pactos tras as eleccións de 2019, non se pecha a unha coalición cos socialistas, BNG ou calquera outra forza de esquerdas, para frear a un PP ao que acusa de limitarse entre 2011 e 2015 a "beneficiar a pequenos lobbys e non pensar en global".
O contexto será diferente ao de fai tres anos. Repetirán os candidatos do PP e do BNG, pero non do PSOE, e xorden novos partidos en todo o espectro político. Preguntado por se a negativa de Beatriz Sestayo a repetir como candidata do PSOE facilitará os acordos, deixa caer que, aínda que a "esquerda en Ferrol está condenada a entenderse" se quere gobernar, en ocasións, o entendemento depende "máis das persoas que das organizacións". "O Partido Socialista é moito máis que Beatriz Sestayo e teñen votantes moi consolidados", pero "se non está Beatriz Sestayo si será máis fácil chegar a acordos de goberno", resolveu.
Por outra banda, Suárez cre que en 2019 a marca de Ferrol en Común xa estará consolidada e non teme que se produza confusión con outras formacións novas como Marea de Ferrol ou Xuntos Actúa, confiando en ser o primeiro alcalde que repite na cidade. En fronte, volverá ter de candidato do PP a José Manuel Rey Varela, actual conselleiro de Política Social, ao que acusa de "escapismo cando saíu derrotado", para unha "vida mellor na Xunta", deixando "unha cuadrilla en Ferrol para facer o traballo sucio", e ao que cre os ferroláns non apoiarán por defender un proxecto "ancorado" noutra época.
