O Concello de Tui está "disposto" a retirar os cascallos de Paramos se a xustiza o "axiliza"

O Concello de Tui anunciou este venres que "está disposto" a "executar" a retirada de cascallos da explosión do almacén ilegal de material pirotécnico no barrio de Paramos "se se atopa unha vía xurídica que permita a axilización desa execución".

O consistorio mantén que "someter" esa execución a un "procedemento ordinario" da lei de contratos "atrasaría moito" a acción e que isto sería "moi lesivo para os veciños". "As reticencias manifestadas en semanas anteriores polo concello con respecto á firma dun convenio teñen que ver co temor ao gran atraso que xeraría o sometemento á Lei de Contratos", aseveraron desde a entidade local.

O Concello de Tui tamén informou de que un "asesor xurídico" enviou este venres "un correo electrónico" á "Vicesecretaria Xeral Técnica do Ministerio de Política Territorial" para realizar "unha consulta xurídica". Así como que enviaron á Secretaria Xeral Técnica do Ministerio de Política Territorial "unha carta solicitando unha reunión de carácter técnico e xurídico para colaborar na elaboración dun convenio entre o Concello e o Goberno central".

Segundo explicaron dende o consistorio tudense, este "convenio" podería ser a "dúas bandas" entre o concello e o Estado, ou a tres, "coa posible incorporación da Xunta", o que estimaron que podería "ser útil". Doutra banda, o Concello de Tui lembrou que non recibiu "un borrador do convenio que propón establecer o Goberno central" e reiterou que "entregou" na Subdelegación do Goberno de Pontevedra un "proxecto" para a execución do desentullo de Paramos.