Jorge Suárez cre que os veciños non o penalizarán polos conflitos internos de En Marea

O alcalde de Ferrol, Jorge Suárez (FeC), manifestou que "tras un proceso de portadas e tumultuoso no interno", en referencia ás eleccións primarias de En Marea, é o momento de centrarse en gobernar na cidade, co obxectivo de revalidar mandato e ante a idea de que os cidadáns diferenciarán un proxecto político de cidade !do resto de conflitos".

"As eleccións municipais sempre son máis en clave local que de país ou Estado, e neste sentido sei que a cidadanía é o suficientemente intelixente para diferenciar o que é un proxecto político de cidade do resto de conflitos que poida existir nos diferentes partidos ou lugares do Estado", asegurou, en rolda de prensa no Concello.

Jorge Suárez, de Ferrol en Común, instou a centrarse en gobernar no que queda de mandato para finalizar con balance positivo. "Agora debemos de centrarnos, polo menos a nivel de Ferrol en Común, no que nos ocupa, sen renunciar a estar en ningunha reunión ou espazo no que nos corresponda estar, pero agora debemos de centrarnos na cidade de Ferrol, no mellor proxecto político que podamos elaborar e así reeditar un goberno que tras moito sufrimento e calvario, ao final do mandato, estou seguro que estaremos satisfeitos do balance definitivo", remarcou. Suárez destacou como alicerces da súa xestión "o labor realizado en cultura, benestar e polas obras e o legado que imos deixar", xa que estimou que "con todas as trabas que nos puxeron e a escaseza de medios, penso que o balance vai ser moi positivo".

PRIMARIAS DE FERROL EN COMÚN

A preguntas dos medios de comunicación, sobre como se desenvolverán as eleccións primarias para escoller candidato á Alcaldía de Ferrol pola formación política a día de hoxe por el liderada, Suárez detallou que na tarde deste mércores celébrase "unha reunión da coordinadora conxuntamente co comité electoral, que vai presentar unha proposta de regulamento de primarias, e onde posteriormente haberá unha asemblea, o 30 de xaneiro, para a aprobación de devandito regulamento".

Neste encontro con todos os inscritos, tamén se somete a votación "o código ético, as bases para a elaboración dun programa electoral participado". A asemblea será a encargada de fixar as datas para presentación de candidaturas, primarias e "todo o demais".

ORZAMENTOS DE 2019

Con respecto aos orzamentos municipais para este ano 2019, Jorge Suárez insinuou que non ten previsto presentar este documento, xa que trasladou que o goberno local está "centrado en sacar adiante os grandes proxectos da cidade". "O orzamento sacarémolo en todo caso para salvar a oferta de emprego público", fórmula que xa intentou sen éxito durante este mandato, polo rexeitamento do resto de grupos políticos na corporación.

"Estamos nunha campaña electoral iniciada de xeito prematuro por moita xente, nós seguimos centrados no día a día, e somos conscientes da dificultade, no mes de xaneiro, a chegar a acordos para lograr unha cidade mellor, cando xa maioría está a pensar en clave partidista", afirmou. Entre as iniciativas que destacou Suárez como "grandes proxectos da cidade", citou a reforma da praza de Armas e Mercado de Caranza, ademais da construción dunha nova pasarela peonil no barrio de Santa Mariña, que permita a súa conexión co Ensanche A, salvando as vías de ferrocarril.