Mariñeiros galegos e Goberno noruegués vense as caras no xulgado
A plataforma 'Long Hope' expón as súas reivindicacións na primeira xornada dun novo xuízo en Oslo.
Por E.P. | SANTIAGO DE COMPOSTELA | 12/02/2019 | Actualizada ás 17:37
Os exmarñeiros españois —na súa maioría galegos— que traballaron en buques noruegueses sen que este país lles recoñeza o dereito a unha pensión de xubilación expuxeron as súas reivindicacións este martes na primeira xornada dun novo xuízo en Oslo.
O portavoz de 'Long Hope' —a plataforma que aglutina aos máis de 10.000 afectados que se estima están nesta situación—-, Alberto Paz, explicou que o avogado que os representa "expuxo a causa como se debía" entre as 9,00 e as 15,00 horas.
O caso quedará visto para sentenza o mércores, 13 de febreiro, tras as intervencións de testemuñas e a avogada que defende os intereses noruegueses fronte a estes antigos traballadores da mariña mercante que pagaron impostos no país nórdico sen recibir prestación a cambio.
Explica que este xuízo "é un banzo máis" ao Tribunal Europeo de Dereitos Humanos de Estrasburgo, xa que no caso de que non lle dean a razón recorrerán ao equivalente ao Tribunal Supremo de Noruega, último paso para esgotar a vía antes de poder ir a Estrasburgo.
"O destino deste barco sempre foi o Tribunal de Dereitos Humanos, non ten outro", deixa claro Alberto Paz. Neste sentido, quéixase de ter que recorrer aos tribunais ante a "ineficacia" dos gobernos noruegués e español para resolver unha situación que "require un arranxo político".
Desde 1948 está rexistrada documentalmente a presenza de mariñeiros galegos en buques de bandeira norueguesa e estímase que pagaron uns 520 millóns de euros en impostos ata 1994. Nos últimos anos este colectivo de persoas maiores leva celebradas decenas de manifestacións e protestas.
