Traballadores de Poligal afirman que non se convidou á dirección ao encontro co Ministerio de Industria

Un dos integrantes do comité de empresa de Poligal, Bernardo Cabezal (CIG), asegurou que o Goberno non convidou a dirección da empresa á reunión mantida este mércores en Madrid co Ministerio de Industria. O representante sindical asegurou que os traballadores senten "defraudados" polo que consideran unha "perda de tempo" e unha "viaxe sen sentido a Madrid" tendo en conta que non acudiron os responsables da empresa a pesar de que así llo trasladou o candidato á Alcaldía de Ferrol polo PSOE, Ángel Mato, o pasado sábado.

Bernardo Cabezal explicou que os integrantes do comité de empresa, formado por UGT e CIG, e outros representantes sindicais reuníronse co director xeral de Industria, Galo Gutiérrez Monzonís. "Repetímoslle o mesmo que xa falaramos con el o pasado venres na reunión que mantivemos na sede do Igape na cidade da Coruña", asegurou o sindicalista, que lamenta que na reunión non se lles avanzou "nada". "Trasladounos que aínda non falara coa empresa e quedou en manter contactos co administrador concursal e coa dirección, para que non presente o ERE", ademais de "buscar alternativas para Poligal", apuntou.

SEN CONTACTO COA EMPRESA

Ao termo do encontro, o representante sindical tamén aseverou que o que lles anunciou Mato non tivo "nada que ver" coa reunión deste mércores. "Non chegando a ser unha tomadura de pelo pero pouco fáltalle", manifestou o sindicalista, que asegura que os responsables do Ministerio de Industria "en ningún momento xustificaron a ausencia da empresa".

Por iso, asegurou que dan "por feito" que a dirección non estaba convidada. "Dá a sensación de que a reunión a tiñan pactada nestes termos", manifestou antes de asegurar non entender "como se pode anunciar que nos se van reunir cos propietarios e resulta que nin tan sequera os convidan".

Fábrica de Poligal en Narón | Fonte: Nemigo Wikipedia