O PSOE é o partido máis votado nas sete cidades galegas
O PP perde 70.000 votos. Podemos só é segunda forza en Vigo e Cs consolídase como terceira e cuarta forza en varias delas. Vox, como quinta, en cinco urbes, superando ao BNG.
Por E.P. | SANTIAGO DE COMPOSTELA | 29/04/2019 | Actualizada ás 01:35
O PSOE gañou as eleccións nas sete cidades galegas, nas que o PP foi a forza máis votada en 2016. Ás portas das municipais do 26 de maio, os populares perden máis de 70.000 apoios respecto de fai tres anos nas urbes.
Pola súa banda, En Marea foi segunda forza en catro cidades en 2016, pero agora En Común-Unidas Podemos tan só quedou de segunda en Vigo. Na Coruña, Santiago, Pontevedra e Ferrol queda no terceiro lugar (En Marea foi segunda fai tres anos), mentres en Ourense e Lugo sitúase de cuarta.
Cs gaña votos en todas as urbes galegas e sobe a terceira forza en Ourense e Lugo, á vez que ocupa o cuarto posto nas outras cinco. Aínda que o BNG sobe en votos, non pasa de ser quinta ou sexta forza en ningunha delas.
Entre as sete cidades, Vox entra como quinta forza en cinco e sexta noutras dúas. En Pontevedra, Lugo, Ferrol e a Coruña cultiva unha porcentaxe de apoios entre o 6,5% e o 6,7%, mentres en Vigo e Santiago queda por baixo do 5% e en Ourense non alcanza o 6%.
No caso da actual En Marea (preséntase en solitario, tras non chegar a acordo con Podemos, Anova e EU, forzas coas que concorrera en 2016) é oitava forza en cinco urbes, por detrás de partidos como Vox e Pacma, mentres noutras dúas é sétima. queda co 1% dos sufraxios e nalgún caso nin chega a esa taxa.
