Preparativos para asumir a competencia do litoral: un procedemento único para axilizar permisos e un catálogo patrimonial
O Goberno galego empezou a dar novos pasos para a concreción e desenvolvemento da nova competencia de xestión e ordenación do litoral, que se fará efectiva a partir do 1 de xullo.
Por Europa Press / Redacción | SANTIAGO DE COMPOSTELA | 14/04/2025 | Actualizada ás 15:08
O Goberno galego empezou a dar novos pasos para a concreción e desenvolvemento da nova competencia de xestión e ordenación do litoral, que se fará efectiva a partir do 1 de xullo. Entre os plans da Xunta, co fin de dotar os procesos de maior axilidade, está o de regular un procedemento único para todas as autorizacións administrativas e títulos habilitantes na costa.
"Falamos de autorizacións de usos de tempada en praias, de ocupación do dominio público marítimo-terrestre, ou en zonas de servidume de tránsito e acceso ao mar, entre outras", detallou a conselleira de Medio Ambiente e Cambio Climático, Ángeles Vázquez, quen compareceu co presidente da Xunta, Alfonso Rueda, ao termo da reunión semanal do Consello da Xunta. E é que o Executivo galego analizou este luns cal será a folla de ruta a seguir tras o peche da nova competencia que asume Galicia, o primeiro traspaso do Goberno desde hai case 17 anos, e que inclúe a creación dun rexistro de concesións no dominio público marítimo-terrestre.
"Vemos prioritario ter un rexistro porque ata agora sempre tivemos moitas dificultades como comunidade para coñecer de primeira man todas as concesións", explicou a conselleira, quen incidiu en que este será efectivo cando a Xunta teña no seu poder "todos os expedientes" que ten que recibir do estado (para facilitalo creouse unha comisión con representantes de ambas as administracións). Iso si, "non están dixitalizados" e, por tanto, "levará un tempo". Ademais, crearase un catálogo de patrimonio cultural do litoral. Ata agora existía un inventario, pero o seu rango elevarase a catálogo de patrimonio cultural porque permitirá non só a identificación dos bens de relevancia, senón que se concretará cales son os seus usos orixinais e os posibles usos futuros que serían "compatibles".
