A Real Filharmonía de Galicia ofrece este venres un concerto gratuíto en San Martiño Pinario, en Santiago
Por E.P. | SANTIAGO DE COMPOSTELA | 16/07/2019 | Actualizada ás 10:08
A Real Filharmonía de Galicia ofrece este venres, día 19 de xullo, un concerto gratuíto ata completar aforamento co obxectivo de achegar a música clásica e a orquestra a diferentes puntos da cidade e a públicos diversos.
Neste espectáculo, que terá lugar ás 21,00 horas, a batuta levaraa o compostelán Maximino Zumalave, director asociado da orquestra, conforme avanzou o Consorcio de Santiago nun comunicado.
O concerto arrincará coa 'Suite nº 3' de Bach, unha das catro suites para orquestra que compuxo o mestre barroco. Nesta obra sobresae o segundo movemento, unha melodiosa aria que contén algúns das pasaxes de maior beleza escritos na historia da música.
Tras ela, soará o 'Adagio' de Samuel Barber, a peza máis popular do compositor estadounidense. Estreouse no ano 1938 en Nova York, nun programa de radio coa Orquestra Sinfónica da NBC dirixida por Arturo Toscanini.
A cita concluirá coa 'Sinfonía nº 7 de Beethoven. Estreada en Viena en 1813 durante un concerto de caridade para os soldados feridos durante a batalla de Hanau. O propio Beethoven dirixiu a orquestra e a peza tivo unha moi boa acollida entre a crítica especializada da época.
Ademais, a Real Filharmonía de Galicia participará nas festas do Apóstolo, conmemorativas do Día de Galicia. A Praza da Quintana acollerá un concerto gratuíto dirixido polo mestre Dimas Ruíz, o 30 de xullo ás 22,00 horas.
