A Xunta convoca un curso de administración electrónica para empregados públicos

A Escola Galega de Administración Pública convocou unha nova edición do curso superior de administración electrónica para empregados públicos, en colaboración coa Axencia para a Modernización Tecnolóxica de Galicia e do Colexio profesional de Enxeñaría en Informática de Galicia.

Esta actividade ten como finalidade profundar, desde unha perspectiva técnico-xurídica e cunha importante parte práctica, na concepción da administración electrónica, incidindo na relevancia que ten a súa implantación nas distintas administracións galegas.

Así, os contidos do programa analizarán desde distintos enfoques a administración dixital para que o alumnado adquira ou perfeccione os seus coñecementos teóricos e prácticos en informática e en dereito.

Este curso superior, que servirá para dar formación a 80 empregados públicos, terá lugar entre o 24 de setembro e o 22 de outubro e será impartido na modalidade semipresencial, con 30 horas presenciais en Santiago de Compostela e 84 en teleformación.

A Xunta lembrou que esta actividade é gratuíta e vai dirixida ao persoal empregado público da Administración autonómica e das entidades instrumentais da Comunidade Autónoma de Galicia que pertenzan aos grupos A1 e A2 do persoal funcionario ou aos grupos I e II do persoal laboral.

No caso de non cubrirse a totalidade das prazas convocadas, as vacantes poderán cubrirse por persoal empregado público da Administración Local, da Administración de Xustiza e das universidades do Sistema Universitario de Galicia.

Traballo fronte a un ordenador. MINISTERIO DE TRABALLO - Arquivo