A Xunta participa nunha convención global en Miami para promocionar o Xacobeo
A presenza de Galicia no evento ASTA enmárcase na estratexia turística do Goberno galego para reforzar a presenza internacional e publicitar o Xacobeo 21 en mercados de interese, como o estadounidense.
Por Europa Press / Redacción | SANTIAGO DE COMPOSTELA | 27/08/2019 | Actualizada ás 13:27
Galicia participa este ano por primeira vez na convención global ASTA, organizada pola Asociación de Axencias de Viaxe Americanas e que se celebra na cidade de Miami.
No marco deste evento, que conta con máis de 1.200 participantes, persoal da Xunta e membros do sector turístico galego impartiron un curso de capacitación sobre o destino Galicia a máis de 150 axentes.
Ademais, a directora de Turismo, Nava Castro, desprazouse ata a convención, na que Galicia está representada no expositor compartido de Turespaña para encontros de traballo e citas profesionais.
O Clúster Turismo de Galicia participa neste evento cos turoperadores Rutas Meigas, Pilgrim Galiwonders, SimplyTravel Galicia, Interrías e Eatour Specialist.
A presenza de Galicia neste evento enmárcase na estratexia turística do Goberno galego para reforzar a presenza internacional e promocionar o Xacobeo 21 en mercados de interese, como o estadounidense.
Estados Unidos é xa o terceiro mercado internacional do que proveñen máis viaxeiros en Galicia, por detrás de Portugal e Alemaña. O pasado ano, máis de 110.000 turistas estadounidenses escolleron Galicia e no que vai de ano a demanda turística de EE.UU. está a crecer a un ritmo do 20 por cento.
