Empregados de subcontratas de R piden que a Xunta teña un "posicionamento claro" contra a deslocalización

Traballadores de subcontratas de R secundaron este mércores unha nova mobilización --a segunda esta semana-- en contra dos despedimentos en empresas que prestan o servizo ao operador de telefonía. Nesta ocasión, concentráronse ante a Delegación da Xunta na Coruña, con pancartas "en defensa" do mantemento dos postos de traballo en Galicia e contra "a deslocalización" ante a decisión, segundo os sindicatos, de trasladar servizos a Asturias.

"Demandamos da Xunta un posicionamento claro para evitar que trasladen postos de traballo fóra de Galicia", explicaron fontes sindicais a Europa Press. Ademais, reclamaron á Xunta "unha reunión a tres" entre Xunta, R e sindicatos para "finalizar este conflito". E é que, segundo apuntan fontes sindicais, seguen "sen ter resposta" da Administración galega "un mes despois" da última reunión, pero confían en tela "xa" en setembro.

Esta mobilización ten lugar despois de que os traballadores da empresa Comfica, unha das subcontratas de R, acordase suspender a folga que mantiñan contra a deslocalización de servizos por parte do operador de telecomunicacións e os despedimentos dunha vintena de traballadores. Con todo, apoiarán concentracións de compañeiros doutras subcontratas, como fixeron este mércores ante a Delegación da Xunta na cidade herculina.

Traballadores das subcontratas de R protestan na Coruña. | Fonte: Europa Press