En SOGAMA falsificáronse analíticas e informes para ocultar a contaminación do vertedoiro da Areosa
ADEGA vén de coñecer que dúas sentenzas do TSXG que en 2009 declaraban improcedentes os despedimentos de dous técnicos de SOGAMA, poden ser determinantes para probar a responsabilidade da empresa no falseamento sistemático e continuado de análises dende 2003 a 2008, e así ocultar a contaminación producida polo vertedoiro da Areosa. Nestas sentenzas, que obrigaban a SOGAMA a readmitir ao ex-xefe de da área técnica e ao ex-xefe de control técnico, cítase un informe da empresa para xustificar os despedimentos. Nel relátanse prácticas de alteración de analíticas, ocultación de información e falsificación documental, poñendo de manifesto o "risco ambiental" -di o informe- do vertedoiro da Areosa. O tribunal recoñece que "existíu unha ocultación das analíticas que estaban fóra dos parámetros esixidos" mais a súa redacción non era responsabilidade destes técnicos. Daquela, de quen é a responsabilidade de estar 6 anos falsificando documentos, ocultando datos á administración e poñendo en risco a saúde e o medio ambiente?
Por ADEGA (http://www.adega.info) | GC ABERTO | 26/04/2012
Para ADEGA estes feitos supoñen a constatación, certificada cos informes da propia SOGAMA e recoñecida polo TSXG nestas sentenzas, do inmenso monte de lixo, fraude e corrupción no que se foi transformando SOGAMA dende a súa posta en funcionamento. Un enorme buraco negro ambiental e unha xigantesca fraude social e económica á cidadanía galega que agora a Xunta tenta reproducir, como unha metástase maligna, no sur de Galiza.
ADEGA lembra ademais que hai aberta unha causa penal polas verteduras de SOGAMA ao río Lengüelle, que a finais de 2009 causaron a morte de máis de 3.000 troitas, e na que están imputados técnicos e responsábeis da empresa. A nosa asociación vai poñer en coñecemento do xulgado que entende esta causa (o de Instrución nº1 da Coruña) e da Fiscalía Ambiental do TSXG estes datos e feitos, que poderían ser constitutivos duns delictos continuados de falsidade documental e prevaricación, e como consecuencia, dun delicto continuado contra o medio ambiente e a saúde das persoas. Cómpre lembrar que o río Lengüelle, o receptor das verteduras piratas de SOGAMA, é afluente do Tambre, que fornece auga potábel á comarca N de Compostela e á propia cidade. E se pasou isto cos lixiviados do vertedoiro, que acontecería realmente coas emisións tóxicas (dioxinas, furanos...) da incineradora?
