Javier Losada culpa ao PP da situación da central das Pontes por "mirar para outro lado"
Por E.P. | A CORUÑA | 02/10/2019 | Actualizada ás 14:36
O delegado do Goberno en Galicia, Javier Losada, culpou ao PP da situación pola que atravesa a central térmica das Pontes (A Coruña), tras o anuncio de peche. En concreto, reprochou aos populares mirar "para outro lado" durante a súa etapa de goberno.
A preguntas dos xornalistas, tras a caravana de vehículos protagonizada este martes desde As Pontes ata a cidade herculina para reclamar unha solución, Losada mostrouse convencido de que, da reunión en Madrid, "sairán liñas de actuacións para buscar unha saída ao que marca Europa e o mundo, alternativas ao carbón".
Para a consecución dese obxectivo, pediu tamén ao Executivo autonómico que "coopere e colabore" co Goberno central na procura dunha "transición xusta". Sobre a situación da central, o delegado do Goberno recoñeceu que é "un problema importante" no que o Executivo tivo que coller "o touro polos cornos".
"Tomar decisións e afrontar cuestións que se podían facer, pero houbo un goberno, o anterior, que miraba para outro lado", asegurou, en referencia ao PP, Javier Losada, quen insistiu en que "xa se sabía" entón que había que facer "transicións e reindustrializar".
