Sondaxe dá a vitoria ao PP en Galicia, un ascenso de Galicia en Común e o regreso do BNG ao Congreso
A enquisa outorga 10 escanos aos 'populares', nove aos socialistas, tres a Galicia en Común e un aos nacionalistas.
Por Europa Press / Redacción | SANTIAGO DE COMPOSTELA | 03/11/2019 | Actualizada ás 12:27
O Partido Popular adiantaría ao PSOE e queda con 10 escanos mentres que os socialistas caerían ata os nove nas próximas eleccións xerais do 10 de novembro. Pola súa banda, Galicia en Común sumaría tres representantes, un máis que os conseguidos o pasado 28 de abril, o BNG volvería ao Congreso cun deputado pola Coruña e Ciudadanos, Más País e Vox non conseguerían representación, segundo a última enquisa de Sondaxe publicada este domingo por La Voz de Galicia.
Deste xeito, os populares conseguirían un escano máis que o PSOE nos próximos comicios en Galicia e, ao mesmo tempo, remontarían o seu resultado do 28 de abril —momento no que obtiveron 8 representantes— para situarse como primeira forza.
Tamén obtería maior número de deputados que nos pasados comicios Galicia en Común, a coalición de Podemos e Esquerda Unida —esta vez sen Equo—, que en lugar de dous sumaría tres representantes no territorio galego.
Se os vaticinios de Sondaxe se cumpren, o partido que lidera Ana Pontón volvería ao Congreso despois de perder a representación nas eleccións de 2015. A Coruña é a provincia na que o Bloque consegue representación, polo que Néstor Rego pasaría a ser deputado na Cámara Baixa.
Por outra banda, nin Más País nin Ciudadanos nin Vox conseguirían escanos por Galicia. A pesar de que anteriores enquisas se daban deputados a Íñigo Errejon e a Albert Rivera en Galicia.
VALORACIÓN DE LÍDERES
En canto á valoración dos líderes políticos, a enquisa de Sondaxe, constata que o presidente do Goberno en funcións e candidato do PSOE, Pedro Sánchez, é o preferido a nivel estatal, cunha nota de 4,01 puntos sobre 10.
Ao socialista séguelle de preto o presidente do PP, Pablo Casado, que remonta cun 3,64. En terceiro lugar, cunha nota de 3,37, sitúase o líder de Más País, Íñigo Errrejón, seguido de Pablo Iglesias (3,34) e, á cola, Albert Rivera (3,31) e Santiago Abascal (2,76).
