Protección para sete especies de morcegos ameazadas de extinción que viven en instalacións de Endesa no Eume e Sil

Endesa puxo en marcha tarefas de conservación de sete especies de morcegos ameazadas de extinción que foron localizadas noutras tantas infraestruturas hidroeléctricas da compañía situadas nos ríos Eume e Sil, grazas a un traballo de campo realizado por un equipo de científicos mobilizados por Endesa.

Segundo explicou a compañía, os túneles, canles e edificios vinculados coa xeración eléctrica son claves para a protección a longo prazo desta fauna, por iso é polo que Endesa puxo en marcha o programa 'Endesabats'.

Un dos hábitats por excelencia dos morcegos son as galerías das centrais hidroeléctricas debido á súa combinación de escuridade, tranquilidade, humidade e temperaturas suaves no inverno e verán. Nas instalacións de Endesa localizáronse numerosas colonias de morcegos, especialmente en túneles laterais ou de acceso ás comportas das presas.

O proxecto Endesabats busca mellorar o coñecemento e a conservación dos morcegos cavernícolas, dos seus requirimentos ecolóxicos e da súa relación co funcionamento das centrais hidroeléctricas. Tamén pretende pór de relevo a importancia destas infraestruturas para os quirópteros ameazados, ademais de propor medidas para procurar a súa conservación e a súa presenza neste tipo de instalacións.

O citado plan iniciouse nos Pireneos en 2014, e en 2019 comezou a aplicarse en Galicia, onde o equipo científico de Endesa realizou un traballo de campo en instalacións dos ríos Eume (A Ribeira e Eume) e Sil (Campañana, Penarrubia, Bárcena, Cornatel e Quereño). Nestas centrais contabilizáronse un mínimo de quince especies de morcegos, que foron identificadas mediante capturas e por gravacións de ultrasóns.

A especie máis abundante detectada en Galicia é o morcego anano (Pipistrellus pipistrellus), seguida polo morcego ratoeiro ribeirego (M.daubentonii) e polo morcego de Cabrera (Pipistrellus pygmaeus). Os científicos tamén rexistraron abundantes contactos sonoros de morcegos grandes de ferradura (R. ferrumequinum), de morcego rabudo (Tadarida teniotis) e do nóctulo grande (Nyctalus lasiopterus).

No total das zonas estudadas, o equipo de Endesa localizou como mínimo sete especies ameazadas, que han de ser protexidas e tamén conservados os seus refuxios e as súas zonas de caza. Os científicos citan en concreto: Barbastella barbastellus, Miniopterus Schreibersii, Nyctalus lasiopterus, Rhinolophus ferrumequinum, Myotis crypticus, Myotis alcathoe, Myotis bechsteinii e Myotis myotis. Entre os lugares de maior interese, destacan as Fragas do Eume, onde se atopa a central de Eume, que acolle a maior diversidade de especies de gran interese.

Ademais de continuar cos estudos de campo e a recompilación de datos, Endesa está a executar algunhas actuacións para adecuar as instalacións hidráulicas e favorecer a conservación dos morcegos: entre outras, acondicionar as entradas aos túneles, colocar caixas-refuxio específicas e diminuír a luminosidade en determinados puntos críticos para os quirópteros.