Veciños de Rois reclaman que se declare zona BIC o Castro Lupario ante os riscos dunha liña de alta tensión

Os veciños de Angueira de Castro, do concello coruñés de Rois, denunciaron este luns a tramitación para a construción dunha rede de alta tensión no conxunto patrimonial de Castro Lupario, ao que pertence a aldea, e propoñen á Xunta o desvío do proxecto para que non afecte á zona de protección do patrimonio, que consideran unha "animalada inconcibible".

O territorio, que comprende unha serie de bens culturais de enorme tradición xacobea como son o Pazo de Faramello, a carballeira de Francos ou a propia aldea de Angueira, forma parte do Camiño Portugués e supón un "emblema mítico de atracción xacobea", segundo o director de Fraternidade Internacional Camiño de Santiago (FICS), José Antonio de Rísea.

Por iso, os veciños acusaron á Dirección Xeral de Patrimonio Cultural de aprobar a construción dunha rede de alta tensión de 220 quilowatts con torretas de 60 metros de altura, máis altas que o propio castro, colocadas a 60 'ou' 80 metros das casas da aldea e que suporía a talla de árbores de 200 metros de ancho.

"Non entendemos como se pode permitir este atropelo a todos estes bens culturais", expresou o membro da plataforma veciñal de Angueira, Marcos Santos, que engadiu que tiveron coñecemento do proxecto en novembro, cando xa estaba na fase final de tramitación. Neste sentido, explicou que os veciños descubriron entón que a zona non está declarada como Ben de Interese Cultural (BIC) tras a paralización en 2010 da súa tramitación.

SEN INVENTARIOS

Ademais, constataron que os inventarios arqueolóxicos e arquitectónicos son practicamente inexistentes, os etnográficos e cartográficos non existen, mentres o Camiño Portugués non está delimitado oficialmente aínda nin é Patrimonio da Humanidade, a pesar de que é unha ruta "consolidada e sinalizada pola Xunta", tal e como indicou o director do FICS.

Por todo iso, os veciños mostraron tamén o seu asombro pola concesión dos permisos a pesar da "carencia de estudos rigorosos de delimitación". Denuncian que a Dirección Xeral de Patrimonio Cultural baseou a súa licenza nun informe de impacto ambiental da Rede Eléctrica realizado por un estudo de Madrid.

Un informe "pobre e sen rigor profesional", segundo Marcos Santos, que "está lonxe de coñecer o terreo e ter noción do valor patrimonial do Castro ao non existir documentación que o constate"; pois "mesmo tiña como primeira formulación pasar o tendido eléctrico polo medio do Castro", manifestaron.

DOCUMENTO ARQUEOLÓXICO COMPLEMENTARIO

Ante esta situación, a Dirección Xeral de Industria, Enerxía e Minas, encargada de promover e consultar os diferentes permisos, permitirá aos veciños presentar un documento arqueolóxico complementario no que exporán "todos os elementos de valor que non lles figuran" e que se porá en coñecemento de Patrimonio nun prazo de 10 ou 12 días para que avalíe o desvío do proxecto.

Este documento, que conta co apoio do Concello de Rois ao que pertence a aldea afectada, preséntase como un informe complementario ás alegacións presentadas polos veciños no seu momento "de forma improvisada ao coñecer o caso nos últimos días do prazo de alegacións".

Por outra banda, presentaron unha proposta de protección desta zona como Ben de Interese Cultural (BIC) mediante a creación dun Centro de Interpretación do Castro que permita a "posta en valor" do Castro. Polo seu lado, o director do FICS resaltou a nula resposta por parte do conselleiro de Cultura ante varias solicitudes de entrevista hai un mes.

Así mesmo, indicou que "confía nos casos precedentes como o do parque eólico sobre o río Oribio", cuxo impacto ambiental é "mesmo moito menor".

Veciños de Rois protestan contra unha liña de alta tensión en Castro Lupario | Fonte: Europa Press