Galicia achégase aos 400 falecidos pola COVID-19

O número de falecidos con coronavirus en Galicia elevouse a 397, tras rexistrarse nas últimas horas 5 novas mortes en residencias de maiores e outros 6 falecementos en hospitais, segundo os datos trasladados pola Consellería de Sanidade.

Así, aos 299 falecidos en hospitais hai que sumar a morte doutras 6 persoas nas últimas horas. Trátase de dous homes de 66 e 76 anos de idade, e unha muller de 88 anos, que estaban ingresados no Complexo Hospitalario Universitario da Coruña (CHUAC); un home de 75 anos ingresado no Complexo Hospitalario de Ourense (CHUO); un home de 82 anos ingresado no hospital vigués Povisa; e unha muller de 82 anos de idade, ingresada no Complexo Hospitalario Universitario de Santiago (CHUS).

Coa morte deste seis persoas, todas elas con patoloxías previas, segundo Sanidade, o número de falecidos con coronavirus en hospitais galegos ascende a 305. Así, rexistráronse 90 falecidos en hospitais da área sanitaria da Coruña, 63 na área de Vigo, 58 mortes na área de Ourense, 42 falecidos na área sanitaria de Santiago, 20 en Ferrol, outros 20 en Lugo e 12 falecidos na área de Pontevedra.

FALECIDOS EN RESIDENCIAS

A esta cifra hai que sumar os 92 falecidos en residencias de maiores desde que se iniciou a pandemia. Deste colectivo, as últimas mortes notificadas son os 2 usuarios do centro DomusVi San Lázaro, de Santiago de Compostela; un da residencia DomusVi de Cangas; outro da residencia DomusVi Matogrande (A Coruña); e outro na residencia de Foz (Lugo).

Desde o inicio da pandemia, morreron 20 maiores dentro do centro DomusVi de San Lázaro, 18 no DomusVi de Cangas, outros 18 na residencia A nosa Señora da Esperanza, 10 na DomusVi do barrio vigués de Barreiro, e tres na residencia Moledo (Vigo).

Tamén se produciron 7 no Portazgo (A Coruña), un no Fogar Bellolar, outro na residencia de Castro Caldelas, un máis en Remanso Claudina-Somoza (A Coruña), 3 na DomusVi Matogrande (A Coruña), un na Caser A Zapateira (Culleredo), un en San Carlos de Celanova, dous na residencia Divino Mestre (Ourense), un na residencia San Pedro de Crecente, dúas nas Fragas de Pontedeume, un na residencia de Bande, un na de Foz e outro na nosa Señora de Fátima (Barco de Valdeorras).

INFECTADOS

O número de infectados por coronavirus COVID-19 en Galicia aumentou en 46 desde este martes ata situarse nos 6.019 casos (0,7% máis), fronte aos 5.973 da xornada pasada, mentres que as altas de pacientes ascenderon ata as 1.298.

Así consta nos datos actualizados da Dirección Xeral de Saúde Pública facilitados este mércores pola Consellería de Sanidade nos que se indica que dos pacientes positivos 128 permanecen en UCI, 746 en unidades de hospitalización e 5.145 en seguimento domiciliario.

Do número de de casos activos de coronavirus en Galicia 1.280 corresponden á área da Coruña; 1.193 á de Ourense; 1.085 á de Vigo; 1.029 á de Santiago; 589 á de Lugo; 505 á de Pontevedra e 338 á de Ferrol.

Ata o momento en Galicia rexistráronse 1.298 altas de pacientes, o que supón 58 máis que as 1.240 contabilizadas este martes, e 391 falecementos, segundo os datos trasladados por Sanidade.

A cantidade de test de coronavirus PCR realizados ata a data ascenden a 50.396 na Comunidade galega.

CASOS ACTIVOS EN RESIDENCIAS

Os casos activos de coronavirus en residencias de maiores chegan aos 1.176 este mércores. O 70,83% deles contabilízanse entre os usuarios destes centros (833) e o 29,17% restante corresponde aos traballadores afectados (343).

Desta maneira, as residencias seguen sendo un os focos de contaxio máis grandes de toda Galicia e a día de hoxe a Xunta púxose ao mando de cinco delas: a residencia Porta do Camiño (Santiago), a de Fundación San Rosendo en Baños de Molgas (Ourense), a DomusVi Cangas, a DomusVi Barreiro e A nosa Señora de Fátima (O Barco de Valdeorras).

A día de hoxe, a da nosa Señora da Esperanza mantén 101 persoas infectadas nas súas instalacións, a de Cangas conta con 91, e a de Vigo con 67. Outros centros que concentran a maior cantidade de casos en Galicia son o DomusVi San Lázaro (Santiago) con 82 ou A nosa Señora de Fátima (O Barco de Valdeorras) con 61.

Con máis de 30 maiores afectados atópanse a residencia O Portazgo (46), DomusVi Matogrande (41), Divino Mestre (38), San José Hermanitas de Ourense (35) e San Pedro de Crecente (35). Nesta última apareceron 13 casos máis desde o martes.

En total son 47 as residencias galegas que contan con algún caso activo de coronavirus entre os seus usuarios e 92 os maiores que morreron nalgún destes centros desde o inicio da pandemia.

Ademais, a Consellería de Sanidade informou que o número de casos detectados en establecementos de servizos sociais corresponden ao 3,8% do total de persoas residentes.

PACIENTES EN UCI

Os pacientes con COVID-19 ingresados en UCI en hospitais de Galicia seguen en descenso e sitúanse este mércores en 128, cinco menos que os contabilizados a xornada pasada na que había 133.

Na Comunidade galega rexístranse, ademais dos 128 pacientes en UCI, 746 infectados noutras unidades de hospitalización, fronte aos 733 da xornada pasada, e 5.145 en seguimento domiciliario --38 máis que os 5.107 contabilizados este martes--. Segundo informaron fontes das áreas sanitarias galegas, na da Coruña e Cee hai 187 pacientes ingresados, deles 31 en UCI do Chuac e 131 en planta do mesmo complexo.