UUAA cualifica de "difícil" o 2024 e pide ás Administracións "resolver os eternos problemas" do sector

O sindicato Unións Agrarias fixo o balance de 2024, un ano que cualificou de "difícil" para o sector e estableceu "materias pendentes" para 2025 e fixo un chamamento ás Administracións para "resolver os eternos problemas" do sector. Así o explicaron este venres nunha rolda de prensa en Santiago a vicesecretaria xeral de UPA, Montse Cortiñas, e o coordinador sectorial de UU.AA. e responsable de Área Externa, Félix Porto.

Félix Porto lamentou que este ano se "visibilizou perfectamente" o que é o cambio climático por mor dos diferentes episodios de "intensas choivas, inundacións e a aparición de novas enfermidades nos animais". Desta forma, explicou que máis de 2.000 explotacións galegas tiveron un animal enfermo --por lingua azul ou a enfermidade hemorráxica epizoótica-- e 1.000 vacas morreron por mor da enfermidade. Aínda que en 2024 conseguiron diferentes melloras neste ámbito, Porto esgrimiu que 2025 "ten que servir" para modificar o Programa de desenvolvemento rural (PDR).

"ETAPA CONVULSA" NO SECTOR LÁCTEO E MERCOSUR

No sector lácteo, continuou Porto, viviuse unha "etapa convulsa" ante a baixada de prezos que "non ten ningún tipo de xustificación". "O 58% de explotacións de leite que desapareceron en España en 2024 son de Galicia, é dicir, 309 das 528 explotacións son galegas", lamentou.

Outro dos "problemas" é a substitución xeracional do sector e lamentaron que "desmantelar" os servizos públicos "é convidar os mozos a que se marchen das explotacións". De cara a 2025 e en referencia ao Mercosur, Félix Porto incidiu en que "hai un temor" a que a entrada de produtos a baixo prezo poida abastecer o mercado.

Con todo, valorou que esa "ameaza" se pode converter en "unha oportunidade". "Temos unha indicación xeográfica protexida amparada nunha produción de carne de alta calidade e, por tanto, o que é necesario é valorizar esa produción de Tenreira Galega suprema para abrir novos mercados", asegurou.