Da visión de Díaz Pardo ás ideas da parella de Feijóo, así naceu e caeu o imperio Sargadelos
A fábrica viviu a súa época de máximo esplendor co intelectual Isaac Díaz Pardo, ao que se lle dedica este 2025 os Días das Artes Galegas. O intelectual e artista galeguista viviu os últimos anos da súa vida triste tras un "golpe de estado" contra a súa xestión. A nova dirección decidiu centrarse nos beneficios e fichou como asesora a Eva Cárdenas.
Por Xurxo Salgado | SANTIAGO DE COMPOSTELA | 02/04/2025 | Actualizada ás 22:14
"O que Isaac tardou tanto en construír e o rápido que o botaron abaixo". Unha das persoas que compartiu co artista a visión de futuro do que era unha empresa artística "símbolo da Galicia do pasado e da Galicia do futuro" describe moi gráficamente o que está pasando nunha icona do deseño do noso país. Unha icona empresarial e artística que o actual administrado único, Segismundo García, acaba de dilapidar coa decisión de pechar a planta de produción da emblemática factoría en Cervo aducindo a "imposibilidade de resolver en prazo as deficiencias" que foran detectadas.
E é que Sargadelos non só é unha empresa, é a imaxe dunha Galicia que Isaac Díaz Pardo reviviu con moita coraxe e esforzo, rescatando a fábrica que en 1806 puxera a andar Antonio Raimundo Ibáñez, Marqués de Sargadelos, aproveitando os xacementos de caolín da zona.
A fábrica que viviu tempos gloriosos no XIX caeu no esquecemento ata que en 1968, o intelectual Isaac Díaz Pardo e o pintor Luís Seoane decidiron resucitar o espírito de Sargadelos con vocación artística e universal. A súa idea era trasladar a tradición galega á arte e facer da nova empresa unha icona da revolución artística e cultural nacional de Galicia.
Foi nesta etapa cando se asentaron definitivamente as cores branco e azul que definirían á marca, que buscou na cultura galegal inspiración para as súas pezas, mentres trataba con iso de difundir e facer patria entre os galegos de posguerra. Esta mentalidade trasladárona máis aló da actividade industrial e comercial, impulsando actividades culturais e sociais como unha editorial (Edicións do Castro), o Instituto Galego de Información, o Museo Carlos Maside, bo lsas, foros e residenc ias artísticas, entre outros.
"GOLPE DE ESTADO" E ANOS CONVULSOS TRAS A MORTE DE DÍAZ PARDO
Un proxecto artístico e de país que se consumiría a comezos do século XXI cun Díaz Pardo que antes da súa morte foi vendo como o froito de toda a súa vida, e do seu amigo Seoane, cambiaba de filosofía e de mans nun abrupto proceso. En 2006 o intelectual galeguista era apartado da dirección da empresa nun traumático proceso que chegou a calificar de "golpe de estado". Acusaba aos socios e aos administradores do Grupo Sargadelos de "ambición polo diñeiro" tras vender varias galerías e centros da firma en cidades como Milán ou Oporto.
Deixouse de lado a filosofía artística e de país, para centrarse só na económica. E iso propiciou que se deixara morrer todo o imperio cultural que nacera ao carón de Sargadelos. Un exemplo é o peche do Museo Carlos Maside, situado no Complexo de O Castro, que leva sen abrir ao público desde 2016, a pesar de estar declarado Ben de Interese Cultural (BIC). Alberga un dos fondos máis importantes da pintura galega contemporánea, con obras de autores como Castelao, Laxeiro, Urbano Lugrís ou Luís Seoane.
NOVA ORIENTACIÓN CON EVA CÁRDENAS
A nova orientación que lle quixo dar Segismundo García nada tiña que ver co espírito de Díaz Pardo. De feito, unha das súas fichaxes estrelas foi a de Eva Cárdenas, ex directora de Zara Home, e parella do actual líder do PP, Alberto Núñez Feijóo.
Cárdenas chegou á empresa a finais de 2020 cando Feijóo era presidente da Xunta, o que obrigou ao Goberno galego a saír abruptamente do padroado da entidade para "evitar malas interpretacións". Incorporouse como asesora externa e foi a responsable do seu relanzamento coa nova tenda de 200 metros cadrados inaugurada a finais de 2021 nun edificio do século XIX na rúa Lagasca, en pleno barrio de Salamanca, o barrio máis selecto de Madrid.
Tras a súa marcha en 2022, Segismundo García, accionista maioritario do grupo, emitía un comunicado no que agradecía a Cárdenas o traballo realizado. "Desde Sargadelos sentimos compracidos e agradecidos por estes case dous anos que Eva Cárdenas compartiu connosco. A súa dedicación e bo facer calaron na nosa organización, facéndonos a todos máis eficientes no noso traballo. Seguro que puntualmente seguiremos colaborando nalgúns proxectos, pero, entre tanto, nesta nova etapa da súa vida, queremos desexarlle o mellor tanto no persoal como no profesional", dícía tras marchar Cárdenas a Madrid para acompañar a Feijóo no seu novo reto de liderar o PP.
TRISTEZA
A noticia do peche da fábrica de Cervo chega ademais xusto un día despois da celebración do Día das Artes Galegas 2025, que nesta ocasión homenaxeou precisamente a Isaac Díaz Pardo polo "innovador legado cultural dunha figura inmensa e irrepetible".
Traballadores e traballadoras da factoría do grupo Sargadelos en Cervo atópanse "tristes", "sorprendidos" e "preocupados" pola situación xerada. Na propia carta remitida con data de este 2 de abril, Segismundo García lembra o requirimento feito pola inspección: "Deberase formar e informar a todos os traballadores con posible exposición a sílice cristalina sobre os riscos existentes para a súa saúde...", recolle.
Así mesmo, os traballadores consultados coinciden en que, dado que o departamento de Recursos Humanos non lles trasladou por escrito ningún "protocolo, documento ou liquidación", prevén desprazarse ata a planta na próxima xornada e, aínda que non poidan entrar se está "pechada", permanecer no seu horario habitual nas instalacións.
