A lei galega de IA entrará en vigor este mes
A nova norma non só regula o seu uso na Administración e nos servizos públicos, senón que tamén establece os mecanismos de promoción e apoio á implantación de sistemas de IA por parte das empresas
Por E.P. | SANTIAGO DE COMPOSTELA | 04/04/2025 | Actualizada ás 12:43
A lei galega que regula a intelixencia artificial (IA), aprobada no último pleno do Parlamento de Galicia e que ten carácter "pioneiro" no marco normativo europeo, entrará en vigor este mes, 20 días despois da súa publicación no Diario Oficial de Galicia (DOG), que se fai eco da mesma este venres.
A lei foi aprobada sen votos en contra o pasado 25 de marzo co voto a favor dos populares e tamén dos socialistas (que accederon no debate definitivo a dar o seu "apoio crítico"); mentres que BNG e o deputado de Democracia Ourensana (D.O.), Armando Ojea, optaron pola abstención.
A nova norma non só regula o seu uso na Administración e nos servizos públicos, senón que tamén establece os mecanismos de promoción e apoio á implantación de sistemas de IA por parte das empresas.
O conselleiro de Facenda, Miguel Corgos, destacou na mesma xornada da aprobación da norma que, ademais de supervisar os usos e aplicacións, a lei garante que se poida demandar unha revisión por parte dunha persoa de "calquera trámite que estea a realizar a través dunha aplicación de IA" ou coa axuda da mesma.
Así mesmo, a norma prevé a creación de órganos específicos encargados de supervisar a implantación da nova tecnoloxía, como un consello autonómico específico; e a figura dun comisionado, responsable de previr, detectar e combater os riscos derivados da IA.
