O peche de Sargadelos, un cabreo do administrador único con Yolanda Díaz?

"Estou farto". O administrador único de Sargadelos, Segismundo García, deixou claro que o peche da factoría en Cervo parece que ten que ver máis cunha cuestión persoal que laboral. E todo polas "insistentes reclamacións" que lle chegaron  por parte de Inspección de Traballo, do ministerio que dirixe a galega Yolan da Díaz. 

Este ministerio trasladou que as actuacións impulsadas por Inspección en 2025 están motivadas pola solicitude dun informe de enfermidade profesional por silicose. Ao parecer, dúas traballadoras da empresa desenvolveron neumoconise (un grupo de enfermidades pulmonares crónicas que se producen por inhalar po de minerais ou metais).

 

Segundo o Ministerio, ademais de emitir o correspondente informe sobre a enfermidade profesional, a Inspección impuxo unha sanción de 5.000 euros por "a falta de medidas adecuadas para evitar a exposición dunha traballadora afectada a po de sílice no seu posto de traballo". Ademais, instou á d irección da empresa a poñer en marcha todas as medidas posibles para evitar situacións semellantes.

 

Unha situación que para Segismundo García supuxo unha auténtica afrenta acostumado, ademais, a non ter que lidiar con problemas laborais, nin sindicatos. De feito, na planta en Cervo non hai representación laboral dos traballadores polo "temor e medo" a que isto traia represalias, como eles mesmos manifestaron. Por iso, sin consultalo con eles, nin moito menos coa Xunta ou co Minsterio de Traballo, García decidiu cortar polo sán, e anunciou o peche da planta aducindo a "imposibilidade de resolver en prazo as deficiencias" que foran detectadas.

 

A XUNTA DE MEDIADORA

 

A súa decisión sorprendeu a todos polo inesperado da mesma. A propia Xunta dixo non saber nada do acontecido aínda que ao longo deste mércores e xoves tentou mediar co empresario. O conselleiro de Emprego, Comercio e Emigración, José González, pedía este xoves á Inspección de Traballo a "máxima flexibilidade dentro da legalidade" con Sargadelos.

A Xunta recoñece que o expediente laboral aberto contén "deficiencias subsanables" dentro duns prazos "abertos aínda", polo que instou tamén a Segismundo García a solventalos. O empresario aduciu que hai "moitas trabas burocráticas" porque en Sargadelos, ao trátarse dun Ben de Interese Cultural (BIC), "non é sinxelo facer as obras e actuacións necesarias".

"Espero que recapacite", subliñou José González, que tamén insistiu en que a Xunta ofrece "máxima colaboración" para que "o problema se poida resolver" debido, engadiu, "á transcendencia que ten unha fábrica como a de Sargadelos". "Máxima colaboración coa empresa, falamos con Inspección de Traballo; imos todos xuntos a buscar que todo isto se resolva canto antes e a fábrica continúe traballando", destacou.

SOLUCIÓN PARA A SEMANA

Avanzada a mañá, os empregados recibiron unha notificación para reunirse coa dirección e, ao termo deste encontro, comunicaron á prensa que Segismundo García transmitira que non hai nin haberá despedimentos e que a súa previsión é que a próxima semana poidan volver traballar na factoría, o cal significaría que chegaría a un acordo para pór fin ao conflito. En calquera caso, o persoal, ante o temor de que unha ausencia tivese consecuencias, decidiron que volverán ás instalacións de Cervo este venres.

CRÍTICAS DA OPOSICIÓN

O peche de Sargadelos está provocando un maremoto político. Tanto BNG como PSdeG piden a Alfonso Rueda que interveña directamente para que se reabra canto antes a fábrica de Cervo.

Así, a portavoz nacional, Ana Pontón, reclamou ao Goberno de Alfonso Rueda que “actúe de inmediato” porque a súa desaparición suporía “moito máis que o peche ordinario dunha empresa” dado que Sargadelos é “marca de País e un símbolo nacional de Galiza”.  “Estamos falando de 200 anos da historia de Galiza”, recalcou.

“Este tema require da máxima implicación da Xunta e o que esperamos é algo máis que un comunicado porque, evidentemente, ten mecanismos para poder intervir e este é un momento no que se debe actuar con todas as ferramentas legais de negociación e políticas que ten o Goberno galego”, afondou.  A líder nacionalista destacou en rolda de prensa que Sargadelos é “un emblema cultural e artístico de Galiza” e un referente económico da industria galega na que entran en xogo outras consideracións a ter en conta para reclamarlle ao Executivo que “tome cartas no asunto”. 

Neste sentido, recordou que a firma recibiu máis de medio millón de euros de axudas públicas, ademais dun crédito subvencionado de 600.000 euros, investimento público vinculado a que e garante a actividade económica e o emprego. Pontón lembrou tamén que a Xunta formou parte do padroado da Fundación Sargadelos que, por certo, abandonou cando a parella do entón presidente Alberto Núñez Feijóo, foi contratada polo novo propietario, e que tanto a Fundación como o padroado recibiron tamén fondos públicos. 

BESTEIRO

Tamén o secretario xeral do PSdeG, José Ramón Gómez Besteiro, reclamoulle hoxe ao presidente da Xunta que “non mire para outro lado” e poña tódolos recursos do goberno galego enriba da mesa para frear o peche de Sargadelos. O responsable socialista emprazou ao goberno galego que se poña a disposición dos traballadores da empresa “dende o minuto un” e non lles dea as costas como fixo xa en dúas ocasións ao abandonar o Padroado en 1992 e en 2020, a última vez alegando un “conflito de intereses”.

Puntualizou que a Xunta “non pode durmirse” nunha situación da gravidade que están a vivir os traballadores e traballadoras da factoría de Cervo, polo que reclamou que empreguen “tódolos procedementos para que a situación non se produza”. Anunciou unha batería de iniciativas parlamentarias para que o goberno galego “poña coto” á situación e garanta a volta a unha “situación de normalidade e de progreso económico”.

Besteiro apuntou que Sargadelos constitúe unha “firma absolutamente viable” dende o punto de vista económico e industrial e tamén polo que representa como “forza cultural” de Galicia, por canto se trata dunha empresa “que representa moito máis que a fabricación de cerámica”.