A Rapa das Bestas de Sabucedo espera superar a COVID-19 como xa superou a Gripe Española e a Guerra Civil
A organización apraza o evento e agarda poder celebralo os días 15 e 16 de agosto.
Por Europa Press / Redacción | Pontevedra | 12/05/2020 | Actualizada ás 11:43
A Asociación A Rapa das Bestas de Sabucedo decidiu aprazar por motivos sanitarios a edición de 2020, que estaba prevista que se celebrase entre o 3 e o 6 de xullo, pero consultará aos veciños da parroquia se pode retomarse os días 15 e 16 de agosto.
A través dun comunicado, a asociación organizadora desta Festa de Interese Turístico Internacional explica que a súa directiva propuxo a anulación das datas habituais porque "considera que sería moi precipitado e inviable para a saúde". Por iso, optou por darse un tempo "para comprobar a evolución da pandemia e das distintas fases da desescalada".
De feito, a Asociación A Rapa das Bestas explica que esta opción foi apoiada "maioritariamente" polos veciños da parroquia de Sabucedo, na Estrada, que volverán ser convocados no mes de xullo para determinar se a edición deste 2020 suspéndese definitivamete ou se celebra do 15 ao 16 de agosto.
"No caso de que Sabucedo opte por esta alternativa (retomala en agosto), todo dependerá loxicamente das autorizacións dos responsables sanitarios e das administracións públicas", subliña a organización.
"TRADICIÓN SECULAR"
Ademais, o equipo reitor da Rapa das Bestas lembra que a celebración "naceu, segundo a cultura popular, en época da peste e superou a Gripe Española de hai un século", así como outros "acontecementos tan terribles como a Guerra Civil". Por iso, esta festa espera afrontar en 2020 "unha nova dificultade".
Pola "importancia de manter unha tradición secular", polo "impriscindible coidado dos cabalos" e por "os parámetros administrativos e legais da identificación e cálculo das reses", a Asociación A Rapa dás Bestas considera que "debería celebrarse", aínda que fose en agosto, se a saúde pública permíteo.
