Beatriz Pino tenta captar votos no sector pesqueiro, unha profesión da que viven "miles de familias galegas"

O eurodeputado de Ciudadanos Adrián Vázquez e a candidata de Cs á Presidencia da Xunta de Galicia, Beatriz Pino, celebraron este xoves a renovación do acordo pesqueiro UE-Cabo Verde porque "miles de familias en Galicia seguirán vivindo do que faenan os barcos españois nesas augas".

O eurodeputado do grupo Renew Europe destacou a relevancia da renovación incidindo no impacto da pandemia da COVID: "a renovación do acordo é moi importante para o sector pesqueiro español, que tanto sufriu nesta crise da COVID-19 e, en especial, para a pesca galega". 

"O sector pesqueiro xa está especialmente afectado debido á pandemia do coronavirus como para engadir máis bloqueos. As institucións temos que traballar para desbloquear problemas e é xustamente o que estamos a facer hoxe. É un logro importante para o noso país e para moitas familias galegas que poderán seguir vivindo de faenar esas augas", declarou o europarlamentario.

Pola súa banda, Pino fixo fincapé en que "todo o que se pesca nas augas de Cabo Verde, como o atún ou o peixe espada, descárgase en España a través do porto de Vigo". "O acordo é fundamental para a economía de miles de familias en Galicia que seguirán vivindo do que faenan os barcos españois nesas augas. Falamos de máis de 400 empregos directos de mariñeiros galegos", subliñou.