Jorge Mira recibe este martes o primeiro Premio de Divulgación Científica da Academia Galega de Ciencias
O catedrático de electromagnetismo da Universidade de Santiago de Compostela é autor de múltiples libros, colaboracións en prensa, radio e televisión, ademais da organización de diferentes actividades e da dirección do Programa Conciencia.
Por E.P. | Santiago de Compostela | 13/07/2020 | Actualizada ás 20:00
O catedrático de electromagnetismo na Facultade de Física na Universidade de Santiago de Compostela (USC) Jorge Mira recibirá este martes, 14 de xullo, o primeiro Premio de Divulgación Científica da Real Academia Galega de Ciencias (RAGC).
Este galardón recoñece os máis de 20 anos de traxectoria no campo da divulgación de Mira a través de múltiples libros, colaboracións en prensa escrita, radio e televisión, ademais da organización de diferentes actividades.
Desde 2005 dirixe o Programa Conciencia, que trae a Galicia a primeiras figuras do mundo científico como diferentes Premios Nobel. Tamén é impulsor de iniciativas como as charlas 'Nerd Nite' e observacións astronómicas na Costa da Morte.
Entre os libros de divulgación publicados por Jorge Mira figuran 'A que altura está o ceo?' e 'A ciencia no punto de mira'.
Por outra banda, dous artigos de Xavier Fonseca --de La Voz de Galicia-- e Selina Otero --de Faro de Vigo-- resultaron gañadores do Premio de Xornalismo Científico Celia Brañas, cun premio de 3.000 euros e un accésit de 1.000 euros respectivamente.
