As mareas locais rexeitan "a incautación" do remanente e piden "blindar a autonomía local"

Doce formacións municipalistas asinaron un manifesto de rexeitamento ao acordo que asinaron a Federación de Municipios e Provincias (FEMP) co Ministerio de Facenda e que consideran unha "incautación" do remanente das arcas municipais, fronte ao que piden "reforzar e blindar a autonomía local".

Concretamente, asinan este manifesto de rexeitamento Compostela Aberta, Marea Atlántica, Marea de Vigo, Ferrol en Común, Alternativa Canguesa de Esquerdas, Sadamaioría, Son de Teo, Ribeiro en Común, Marea de Noia, Xuntos polas Pontes, Veciñanza de Cuntis e Unidade Veciñal de Dodro.

"O plan do Ministerio de Facenda para a incautación dos remanentes de concellos e deputacións, aprobado onte pola FEMP, pisa as competencias municipais, adoece dun marcado carácter centralista e supón un desprezo para o traballo dos concellos", sinalan no manifesto, no que apunta que este plan cuestiona o espírito 140 da Constitución Española e "rebenta a xa moi tocada autonomía municipal, pretendendo tutelar aos concellos".

Desta maneira, fronte ao que consideran unha "escusa para limitar o gasto e o investimento locais", as mareas municipalistas de Galicia demandan a protección das persoas, "sobre todo, as máis vulnerables".

Lembran que nun contexto como o actual, os concellos son "vitais" para a cidadanía. "Non se pode gobernar de costas ás administracións locais, que son as máis próximas á xente e as primeiras ás que se acode", apuntaron.

Para estas forzas, "agora máis que nunca, o municipalismo galego esíxelle ao Estado a supresión da Lei de racionalidade orzamentaria e sustentabilidade". Neste sentido, lembran que o pleno da corporación de Santiago de Compostela --que dirixe o socialista Xosé Sánchez Bugallo-- ten aprobada unha moción conxunta de Compostela Aberta, BNG e PSOE en relación ao uso dos remanentes municipais por parte das entidades locais.