A CIG presenta alegacións á lei de transición enerxética porque "deixa todo en mans privadas"
Advirte da "desertización de comarcas enteiras" polo "desmantelamento total" da industria, en liña co ocorrido nas centrais térmicas de Meiramma e As Pontes.
Por Europa Press / Redacción | SANTIAGO DE COMPOSTELA | 02/09/2020 | Actualizada ás 13:56
A CIG presentou alegacións a un proxecto de lei de transición enerxética que ve "centralista" ao "invadir competencias" das comunidades autónomas e porque "deixa todo en mans privadas" e nela non hai "ningún espazo para o público".
A central trasladou as súas propostas, un total de 26, ao BNG no Congreso, que se comprometeu a rexistralas "na súa integridade". O prazo para alegar concluía leste mesmo mércores, aínda que houbo solicitudes para amplialo.
En rolda de prensa, o secretario xeral da CIG, Paulo Carril, advertiu da "desertización de comarcas enteiras" de Galicia por un texto que, na práctica, suporá o "desmantelamento total" do tecido produtivo, en liña co ocorrido coas centrais térmicas de Meirama (Cerceda) e As Pontes, na Coruña.
Neste contexto, criticou a "absoluta inacción" da Xunta ante un texto que ten, ao seu xuízo, "carácter máis propagandístico que de cambios reais", e avogou por "avanzar en soberanía para Galicia" e pór "a enerxía ao servizo do pobo".
INDUSTRIA DO MAR, ELECTROINTENSIVAS E AUTOMOCIÓN
Tamén demanda a supresión do artigo referida a planificación e xestión do dominio marítimo terrestre, por "inaceptable" polo que suporá para toda a industria relacionada co mar (cocedeiros, depuradoras, plantas acuícolas...), segundo avisou Dores Martínez Castelo, responsable da Federación Galega de Alimentación, Mar, Transporte, Téxtil e Telecomunicacións e actividades afíns.
Pola súa banda, o representante de industria da CIG, Fernando Branco Parga, tachou a norma de "lei de mercadotecnia" e lamentou que non se aproveite para establecer unhas condicións para as industrias electrointensivas, como Alcoa, á espera da aprobación dun estatuto propio.
Da CIG-Industria, Xoán Xosé Bouzas Aboi avisou das consecuencias que a lei, tal e como está configurada, terá sobre o sector da automoción. "Podemos presaxiar o mesmo deserto industrial que coas térmicas", augurou, tras sinalar a "afectación" para Citroën e as empresas auxiliares da eliminación das emisións de CO2 a partir do ano 2040.
