Cae un plataneiro de máis de 100 anos no centro de Pontevedra

Unha brigada de traballadores da firma Redenor retirou na mañá deste martes coa axuda dun camión un plataneiro caído de madrugada, en torno ás 5:00 horas, na Alameda de Montero Ríos en Pontevedra, á altura dunhas escaleiras situadas na cabeceira sur do parque, cara a rúa Alameda (nas inmediacións dun paso peonil).

O concelleiro de Desenvolvemento Sostible e Medio Natural, Iván Puentes, explica que o incidente, que se saldou coa rotura dun colector de lixo e dun pedaciño de muro, debeuse a un “vicio oculto, unha podremia, no núcleo do exemplar, que, como outros do parque, ten máis de cen anos de antigüidade” e que “non evidenciaba unha sintomatoloxía externa”.

Tal e como lembra o edil socialista, “hai apenas un ano, antes das Festas da Peregrina de 2019, revisáronse unha a unha tódalas árbores e taláronse seis nas que se tiña detectado un deterioro moi importante e que nalgún caso estaban practicamente baleiras por dentro”.

“Non era o caso deste plataneiro de sombra que, como indicamos, non presentaba síntomas na madeira exterior. Trala súa retirada, vaise talar por completo para evitar calquera risco. O proxecto que estamos a desenvolver consiste precisamente en analizar as mellores zonas para repoboar o parque”, subliña Iván Puentes.

REVISIÓN DAS ÁRBORES

O concelleiro de Desenvolvemento Sostible constata que o Servizo de Parques e Xardíns, que xa tiña previsto realizar unha poda e unha nova revisión coincidindo coa época de caída da folla, “adiantará a setembro e outubro dita revisión para volver testar o estado das árbores”.