A Xunta difundirá a cultura galega en Nova York en plena ofensiva proteccionista de Trump
Cultura e a Fundación Manolo Paz promocionarán a cultura galega cunha exposición en Nova York en 2026.
Por Europa Press / Redacción | SANTIAGO DE COMPOSTELA | 19/04/2025 | Actualizada ás 13:13
A Xunta e a Fundación Manolo Paz colaborarán para pór en marcha unha "gran exposición" que se celebrará en 2026 en Nova York para promocionar a cultura e a arte de Galicia. A maiores, esta mostra verase complementada cunha programación cultural paralela no Instituto Cervantes desta cidade norteamericana.
Así o anunciou este sábado o secretario xeral da Lingua, Valentín García, tras visitar co escultor e a cónsul de España na cidade, Marta de Blas, a zona do Park Avenue onde, entre marzo e outubro do ano que vén, estarán expostas as obras.
Neste contexto, o representante da Lingua abordou durante os últimos días co director do Instituto Cervantes en Nova York, Javier Valdivieso, os preparativos das actividades culturais complementarias á exposición, "que será un dos grandes acontecementos culturais de Galicia no exterior, como preámbulo do Xacobeo 2027".
Con todo, a Xunta cualificou esta exposición e a programación paralela como "unha enorme oportunidade de promoción" para Galicia e lembrou nunha nota de prensa que a súa celebración, en vésperas do Ano Santo, suporá "un importante reclamo" para atraer visitantes de Estados Unidos.
