Beatriz Pino pide que a Xunta incremente as axudas para favorecer a conciliación na etapa post covid

A portavoz de Cidadáns Galicia, Beatriz Pino, reclamou este mércores á Xunta que incremente as axudas para favorecer a conciliación da vida laboral e familiar, tendo en conta as dificultades derivadas da actual etapa, marcada pola covid-19.

Así, Pino lembrou o "ritmo de contaxios que se vive en Galicia" e o peche dalgún centro de ensino, situacións que "obrigan a moitos pais a ter que quedar ao coidado dos seus familiares, na súa maioría fillos". "Hai que redobrar esforzos e buscar alternativas que promovan esta conciliación, máis necesaria que nunca, e, para iso, unha medida sería premiar a aquelas empresas que favorezan a conciliación dos seus traballadores e que avoguen polo teletrabajo", destacou.

A responsable da formación en Galicia tamén pediu á administración autonómica que amplíe estas axudas a profesionais liberais e autónomos.

Pino lembrou que Ciudadanos xa expuxo medidas de conciliación solicitando axudas para aquelas familias que necesitaban reducir a súa xornada para coidar dos seus fillos ou que debían contratar a unha persoa para o coidado dos mesmos.

Neste sentido, explicou que un dos efectos máis directos da pandemia na organización dos fogares con menores en idade escolar é a evidencia de que a conciliación laboral e familiar "é un reto difícil de cumprir". "É un freo para as mulleres que seguen sendo quen asumen, maioritariamente, as tarefas do coidado dos fillos", engadiu.

Pino apuntou que "non se pode seguir permitindo" que as mulleres se vexan obrigadas a elixir entre a carreira profesional e o coidado dos fillos ou das persoas maiores dependentes. "É fundamental que as administracións atopen solucións que non impliquen unha redución salarial para facilitar a conciliación fomentando o teletraballo e a flexibilidade das xornadas laborais", resolveu.

A candidata de Ciudadanos á Presidencia da Xunta de Galicia, Beatriz Pino.. CIUDADANOS - Arquivo