Alba Cid, Premio Nacional de Poesía Joven

A ourensá Alba Cid foi galardoada co Premio Nacional de Poesía Joven 'Miguel Hernández', correspondente a 2020, pola súa obra 'Atlas'. O premio, concedido polo Ministerio de Cultura e Deporte, está dotado con 20.000 euros.

O xurado elixiu esta obra "por constituír unha reflexión sobre como a literatura elabora mapas da realidade e sobre o valor moral que pode ter a literatura como problematización do mundo". "É poesía tanto do coñecemento como da emoción, e presenta unha nova cartografía na que se funden o mapa do corpo co do planeta, a memoria e o enigma", engadiu.

Á súa vez, tamén destacou que é unha obra "escrita coa lóxica do asombro e chea de referencias culturais que se contemplan desde unha mirada excéntrica que fermenta en rebeldía".

Alba Cid é poeta e investigadora en poesía contemporánea. Participou en volumes como 'Poética da casa' (2006) e na antoloxía de 'Apiario Non seu despregar' (2016). Publica textos de creación e reseñas en revistas como Graal, Luzes, Tempos Novos e Dorna, e é colaboradora de Radio Galega.

Os seus poemas foron traducidos ao castelán, grego, inglés e portugués, e apareceron en Oculta Lit, The Offing e Poem-a-Day, unha serie web da Academy of American Poets. Actualmente está a cargo do Centro John Rutherford de Estudos Galegos da Universidade de Oxford.

O xurado estivo presidido por María José Gálvez Salvador, directora xeral do Libro e Fomento da Lectura e actuando como vicepresidenta Begoña Cerro Prada, subdirectora de Promoción do Libro, a Lectura e as Letras Españolas.

DECLARACIÓNS

Tras coñecer a nova, Alba Cid destacou a importancia de "levar a poesía aos mozos". "É importante o feito de levar tamén a poesía aos mozos, sacala un pouco de certos estereotipos que talvez o ensino e certos modos de ensinar poesía foron marcando", sinalou a poeta.

A galardoada chegou á poesía "desde moi pequena" e foi unha lectora "sen límites" de calquera xénero. "Resúltame moi difícil de entender que non unamos esforzos nisto, que non descubramos realmente a calquera idade a poesía", dixo.

Para ela, a poesía non se está perdendo coas novas xeracións. "Tamén é certo que eu estou nunha contorna privilexiada como o galego, no que a tradición poética está firmemente consolidada. A vida da poesía vai para longo", explicou.

Así mesmo, Cid lamentou que a pandemia "non fixo máis que subliñar moitísimos defectos sistémicos ou moitas debilidades que xa existían", algo que, ao seu xuízo, é "máis evidente en determinados ámbitos das artes escénicas".

En concreto, a escritora fixo referencia a que ao mundo do libro "faríanlle falta apoios máis evidentes, desde posibles bolsas para a creación ata plans que reforcen" aos autores. "Supoño que a pandemia non fixo máis que evidenciar esas carencias", sentenciou.

A escritora asegurou que é unha "honra inmensa, unha alegría" recibir este galardón, "como todos aqueles premios aos que non te presentas".