Pontón pide ao Goberno que mellore os orzamentos porque "non pode haber PGE sociais" se "discriminan" a Galicia

A portavoz nacional do BNG, Ana Pontón, considerou que "non pode haber" Orzamentos Xerais do Estado "sociais" se estes "discriminan a Galicia" e instou ao Goberno central a "mellorar" o investimento á Comunidade galega.

"Entendemos que mentres a outras comunidades autónomas están a incrementarse de maneira moi forte, como pode ser Cataluña, na que se están incrementando un 40%, o que hai para Galicia son reducións nos investimentos", manifestou ao ser preguntada pola postura da súa formación en relación ao proxecto de PGE presentado polo Executivo do Estado.

Respecto diso, sinalou que a emenda á totalidade presentada polo Bloque é "un toque de atención" para avisar de que Galicia "necesita un trato xusto" nos orzamentos. "Temos a vontade de que haxa unha negociación que permita mellorar os investimentos en Galicia e é o que lle imos a reclamar ao Goberno de Sánchez", sinalou.

Neste sentido, asegurou que "os galegos e as galegas" non merecen "menos" e referiuse a a situación "excepcional" para asegurar que o que se require é "que se compense o déficit dos investimentos que puido haber noutros ámbitos como as infraestruturas" pero que "se atenda tamén á débeda que ten o Estado noutros ámbitos como a dependencia ou a necesidade de saneamento" das rías.

"En definitiva, non pode haber uns orzamentos sociais se discriminan aos galegos", afirmou para lembrar que aínda se está no "inicio da tramitación" e que espera "que haxa vocación de mellorar o investimento en Galicia".

A portavoz nacional do BNG, Ana Pontón, en rolda de prensa | Fonte: Europa Press